Արցախի Հանրապետության խորհրդարանի ղեկավար Աշոտ Ղուլյանի նախագահությամբ փետրվարի 26-ին տեղի է ունեցել ԼՂՀ 5-րդ գումարման Ազգային ժողովի 11-րդ նստաշրջանի առաջին լիագումար նիստը:
Ազգային ժողովի նախագահը ներկայացրել է խորհրդարանի հունվար-փետրվար ամիսների գործունեությունը, հակիրճ անդրադարձ կատարել ղարաբաղա-ադրբեջանական զորքերի շփման գծում տիրող իրավիճակին ու քաղաքական իրադարձություններին :
Խորհրդարանը հաստատել է 11-րդ նստաշրջանի ժամանակավոր հաշվիչ հանձնաժողովի կազմը, որի անդամներ են վերահաստատվել պատգամավորներ Ռոմելա Դադայանը, Կամո Բարսեղյանը և Լյուդմիլա Բարսեղյանը։
Քննության առնելով նիստի օրակարգում գտնվող օրինագծերը՝ Ազգային ժողովն ընդունել է «Կրթության մասին» ԼՂՀ օրենքում լրացումներ և փոփոխություններ կատարելու մասին և դրա հետ կապված օրենքների փաթեթը, «Զբոսաշրջության և զբոսաշրջային գործունեության մասին» ԼՂՀ օրենքում լրացումներ կատարելու մասին», «ԼՂՀ ջրային օրենսգրքում լրացումներ և փոփոխություններ կատարելու մասին», «Օրգանական գյուղատնտեսության մասին» օրենքները։
Կարդացեք նաև
Խորհրդարանն ի գիտություն է ընդունել Լեռնային Ղարաբաղի Հանրապետության դատախազության 2014 թվականի գործունեության մասին հաղորդումը, որը ներկայացրել է ԼՂՀ Գլխավոր դատախազ Արթուր Մոսիյանը և Լեռնային Ղարաբաղի Հանրապետության քաղաքացիական ծառայության խորհրդի կողմից 2014 թվականին իրականացված աշխատանքների մասին հաղորդումը, որը ներկայացրել է ԼՂՀ ՔԾ խորհրդի նախագահ Բորիս Առուշանյանը։
ԱԺ կանոնակարգի համաձայն տեղի է ունեցել նաև օրենսդիր-գործադիր հարցուպատասխանի առաջին ընթացակարգը նոր նստաշրջանում՝ կառավարության անդամների ու փոխվարչապետ Արթուր Աղաբեկյանի մասնակցությամբ:
ԼՂՀ Ազգային ժողովի մամլո ծառայություն
