Տավուշի մարզի Բերդի տարածաշրջանի սահմանամերձ Վերին Կարմիրաղբյուր համայնքի ղեկավար Կամո Չոբանյանն ասաց, որ ինքը գյուղի այգիների հրդեհի վնասների հետ կապված գործով պատրաստվում է գրավոր դիմել ՀՀ գլխավոր դատախազ Գագիկ Կոստանյանին եւ ՀՀ քննչական կոմիտեի նախագահ Աղվան Հովսեփյանին: Գյուղապետն ասաց, որ հրդեհի վնասների հետ կապված քրեական գործի քննությունը անհարկի կերպով ձգձգվում է:
Նա տեղեկացրեց, որ քրեական գործի քննությունը կատարում է Բերդի քննչական բաժնի քննիչը: «Վերջերս մեկից նոր ցուցմունք են վերցրել, հիմա էլ այդ պատճառաբանությամբ են գործը ձգձգում»՝ ասաց Կ. Չոբանյանը: Նա հայտնեց, որ առկա խնդիրը տարբեր լրատվամիջոցներ լուսաբանել են, վերջերս էլ «Հայլուրն» էր այդ մասին ռեպորտաժ պատրաստել, սակայն «սայլն առաջ չի շարժվում»: Գյուղապետի վկայությամբ ՝ սահմանամերձ գյուղի բնակիչներն իրենց իրավունքները պաշտպանելու համար պատրաստ են տարբեր, ընդհուպ մինչեւ ծայրահեղ միջոցների դիմել:
Հիշեցնենք, որ 2014թ. օգոստոսի 7-ին սահմանամերձ Վերին Կարմիրաղբյուրի խաղողի եւ պտղատու այգիներում «Եղվարդշին» ԲԲԸ-ի կողմից իրականացված ոռոգման ջրագծի ապամոնտաժման աշխատանքների ժամանակ, անվտանգության կանոնները չպահպանելու հետեւանքով, եռակցման ապարատից թռած կայծից հրդեհ է բռնկվել, որը մեծ վնաս է պատճառել պտղատու եւ խաղողի այգիներին: Սկզբում խոսք էր գնում 48 ընտանիքներին պատկանող 12 հա այգիների , հետո՝ 37 ընտանիքին պատկանող 6.8 հա այգու մասին: Հավելենք, որ «Եղվարդշինը» հրդեհի պատճառ դարձած աշխատանքները կատարել է առանց շինարարական թույլտվության, հրդեհից հետո Վ. Կարմիրաղբյուրի համայնքապետարանից ստացել է շինթույլտվություն:
Փետրվարի 14-ին Վերին Կարմիրաղբյուր է գնացել «Եղվարդշին» ԲԲԸ տնօրեն Սամվել Վարդանյանը, ով հանդիպել է հրդեհից առավել վնասներ կրած 5 բնակիչների հետ,սակայն վնասների հատուցման հարցի շուրջ նրանց միջեւ փոխհամաձայնություն չի կայացել: Կ. Չոբանյանն ասաց, որ գործն այնպես է տարվում, որ հրդեհի միակ մեղավոր համարվի եռակցման աշխատանքներ կատարած բանվորը, որին սեփականության իրավունքով պատկանում է ընդամենը 1 հա հող: Նման ունեցվածքով եռակցողը, բնականաբար, չի կարող փոխհատուցել գյուղացիների այրված այգիների կորուստը: Կ. Չոբանյանը կարծում է, որ «Եղվարդշինի» տնօրենը հովանավորներ ունի,այդ պատճառով էլ գործի քննությունը չի ավարտվում, գյուղացիների խնդիրը չի լուծվում:
Կարդացեք նաև
Ոսկան ՍԱՐԳՍՅԱՆ
