Այս շատ գունեղ, համեղ ճաշատեսակը ձեր տոնական սեղաններին յուրահատուկ շուք կտա: Ինչպես սեւ սալորաչիրը, այնպես էլ նարինջը հավի հետ շատ լավ են համադրվում, տեսքն էլ շատ գեղեցիկ է:
Անհրաժեշտ մթերքները
Հավի կրծքամիս- 1 կգ
Սեւ սալորաչիր- 150-200 գրամ
Կարդացեք նաև
Նարինջ- 1 կգ
Սոխ-1 հատ
Սխտոր- 2 պճեղ
Կոճապղպեղ (իմբիր)- 1սմ-անոց կտոր
Սպիտակ չոր գինի- 1 բաժակ
Բուսական յուղ- 3 ճաշի գդալ
Համեմունքներ
Պատրաստման եղանակը
Հավի կրծքամիսը լավ ծեծեք: Եթե չունեք հատուկ հարմարանք՝ կարող եք դանակի հակառակ կողմով ծեծել: Մեկ պճեղ սխտորը միջից կիսեք եւ քսեք կրծքամսի վրա: Ապա երկու կողմից աղ եւ կարմիր աղացած պղպեղ արեք:
Անկորիզ սալորաչրերը մեկ շարքով երկայնակի դասավորեք կրծքամսի վրա, փաթաթեք եւ կապեք հաստ թելով: Թողեք որոշ ժամանակ հանգստանա: Եթե մինչեւ երկու ժամ եք թողնելու, կարող եք սենյակային ջերմաստիճանում պահել: Սակայն եթե ավելի երկար եք պահելու, վրան մի քիչ ձիթապտղի յուղ արեք, մեկ-երկու կտոր սխտոր դրեք, ու դրեք սառնարան: Սխտորն ու ձիթապտղի յուղը թույլ կտան մինչեւ երկու-երեք օր այդպես մնա սառնարանում:
Լավ տաքացրեք գրիլ թավան, հավի ռուլետները բոլոր կողմերից մեկական րոպեով առանց յուղի տապակեք գրիլ թավայի մեջ, ապա դրեք մի կողմ՝ հանգստանա:
Այլ թավայի մեջ բուսական յուղով տապակեք սոխը, ավելացրեք քերած սխտորը: Կեղեւահանեք կոճապղպեղը եւ մանր քերեք, ավելացրեք սոխին եւ սխտորին: Նարինջները լավ լվացեք, կեղեւը քերեք թավայի մեջ, իսկ մնացած նարինջը կամ մսաղացով կամ էլեկտրական խառնիչով (բլենդերով) մանրացրեք:
Սոխեռածին ավելացրեք գինին, աղացած նարինջը, եւ հավի ռուլետները դրեք այդ խառնուրդի մեջ: Թողեք եփվի մոտ կես ժամ: Ընթացքում պարբերաբար խառնեք թանձրուկը, որպեսզի հանկարծ տակը չկպչի: Եթե կարիք լինի՝ էլի գինի ավելացրեք: Եթե ցանկանում եք՝ կարող եք մի քանի սալորաչիր էլ կտրատել թանձրուկի մեջ:
Մատուցեք կրծքամիսը երկու կամ երեք կտորի բաժանած վիճակում՝ բրնձի կամ բանջարեղենի հետ, կողքն անպայման դրեք նարնջի թանձրահյութից:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
