«Խնդիրները հիմնականում տեխնիկական բնույթի են: Մենք գնալով համոզվում ենք, որ տվյալ խնդիրը եթե կա կամ մենք են մտածել, որ դա խնդիր է, հարթվում են»,- Aravot.am-ի հետ զրույցում ասաց «Սարգիս Կարոլինա» ընկերության ներկայացուցիչ`Երվանդ Թարվերդյանը, պատասխանելով հարցին`ի՞ նչ խնդիրների են հանդիպում հայ գործարարները ԵՏՄ-ի շրջանակներում:
Հիշեցնենք, որ հունվարի 2-ից Հայաստանն արդեն պաշտոնապես ԵՏՄ անդամ է:
Ամեն դեպքում, մեր զրուցակիցն ասաց, որ կա խնդիր` կենդանական ծագման ապրանքների հետ կապված ու այսօր հրավիրված «Եվրասիական տնտեսական միության շուկան առանց խոչընդոտների» թեմայով քննարկման ժամանակ ինքը դա ներկայացրել է:
«Գոյություն ունեն ՄՄ երկրների ձեռնարկությունների ռեեստրներ եւ երրորդ երկրների ռեեստրներ: Մինչեւ հունվարի մեկը Հայաստանի ձեռնարկությունները պետք է գրանցվեին երրորդ երկրների ռեեստրում: Սակայն, ՌԴ-ի հայտնի «Ռոսսելխոզպատրեբնադզորի» կայքում մեր ընկերությունները դեռ գրանցված են երրորդ երկրների ցանկում: Կարծում եմ, դա տեխնիկական խնդիր է եւ ֆորմալ բնույթ է կրում, բայց հարցրել եմ, թե ե՞րբ կդառնա ՄՄ երկիր»,- ասաց մեր զրուցակիցը:
Կարդացեք նաև
Եվրասիական տնտեսական հանձնաժողովի կոլեգիայի անդամ Տատյանա Վալովայան ասել է, որ հարցն ապրիլի 2-ին կայանալիք քննարկմանն էլ կբարձրացվի, «Ռոսսելխոզպատրեբնադզորի» հետ էլ կքննարկվի եւ հնարավորինս արագ դրան լուծում կտրվի:
Հետաքրքրվեցինք`չկա՞ն խնդիրներ, որոնք տեխնիկական չեն: Երվանդ Թարվերդյանը պատասխանեց. «Ճիշտն ասաց, այդ հարցին ես եմ ասում տեխնիկական, բայց այն ավելի գլոբալ է: Չեմ ուզում մտածել, որ այդ կազմակերպությունն է սահմանափակումներ դնում, այլ ինչ-որ մի բազայի, ինչ-որ մի աշխատողի թերացման, անգործության կամ թյուրիմացության պատճառ է»:
Նելլի ԳՐԻԳՈՐՅԱՆ
