Քաղաքացիական ակտիվիստ Դավիթ Սանասարյանի խոսքով, Իշխանությունների կողմից փորձ է արվել գրագետ քաղաքացիներին ներշնչել, թե Բաղրամյան պողոտայում ձեւավորված պայքարը զուտ սոցիալական հարց է, քաղաքական պայքար չէ:
«Սա քաղաքական հարց է, կուսակցական դրոշներ չկան ու թույլ չենք տալու, բայց սա քաղաքական պայքար է: Մի տարվեք, թե սա քաղաքականացնում են, ովքեր դժգոհ են կազմակերպչական հարցերից, առաջարկություններ կարող եք ներկայացնել»,- ասաց Դավիթ Սանասարյանը:
Այսօր երիտասարդները նախատեսել էին մինի ռոք համերգ, բայց հարթակում դեռ ելույթները չավարտված՝ հարակից տների հոսանքը անջատվեց, ցուցարարները սկսեցին ամոթանք տալ, որովհետեւ այն կարծիքին էին, որ ոստիկաններն են միտումնավոր անջատում, որ խոչընդոտեն հավաքը, իրենց ելույթները: Բայց հոսանքազրկումը կարճ տեւեց, ու երիտասարդները իրենց մինի համերգով ներկայացան:
Արփինե ՍԻՄՈՆՅԱՆ
