Օգոստոսի 26-ին կայացավ Երեւանի թիվ 27 հիմնական դպրոցի տնօրենի թափուր պաշտոնի համար մրցույթը, ու ամենեւին չզարմացա, որ տնօրենի պաշտոնի 4 հավակնորդներից տնօրեն ընտրվեց դպրոցի նախկին տնօրեն Սուսաննա Սարգսյանը, որը վերջերս դատապարտվել էր պետությանը խոշոր չափերի գույքային վնաս պատճառելու համար: Նման երեւույթները արդեն օրինաչափ են թվում:
Սակայն այս մասին չէ, որ ուզում եմ գրել, մանավանդ թեմային անդրադարձել եմ մեր կայքի այսօրվա հոդվածում: Իսկ այն, ինչ պատահեց ընտրությունից հետո, ոչ միայն տարօրինակ էր, այլեւ տհաճ: Ընտրության արդյունքներից ապշած Անահիտ Բախշյանից, որը նույն դպրոցում ժամանակին տնօրեն է եղել, լրագրողներս ցանկանում էինք հարցազրույց վերցնել, սակայն մի քանի անգամ մեր փորձերը ձախողվեցին:
Ինչ-ինչ լծակների շնորհիվ ընտրված Սուսաննա Սարգսյանի կողմնակից ուսուցիչները տեսախցիկների ու ձայնագրիչների մոտ դիտմամբ ճչում էին ու բարձր ծափահարում, որպեսզի Անահիտ Բախշյանին չկարողանք ձայնագրել ու տեսագրել: Քաղաքավարի խնդրեցինք չխանգարել, բայց ապարդյուն: «Մանկավարժները» մեզ «խորհուրդ տվեցին» դրսում ձայնագրել:
Ապշած էինք՝ եւ ձեռքերով անկանոն շարժումներ անող ու ճչացող այս զանգվածը դպրոցում երեխա՞ է կրթում: Նրա՞նք են դաստիարակում վաղվա քաղաքացիներին, որոնց մասին տնօրենը սիրուն բաներ է շարադրել իր ծրագրում: Այսինքն՝ սովորեցնելու են քծնե՞լ հաղթողին, չհանդուրժել այլ տեսակետ ունեցողի՞ն…
Կարդացեք նաև
Չեմ ցանկանում թվարկել մնացածը… Երբ «խանգարիչ» մանկավարժները թույլ չէին տալիս աշխատել, ակամայից հիշեցի տնտեսագիտական համալսարանի միջադեպը ՝ Տարոն Մարգարյանի ատենախոսության պաշտպանության լուսաբանումը խոչընդոտած ուսանողներին, թեւավոր խոսք դարձած՝ Սաքուլիկին: Բացի իրենց կերպարի կերտման մյուս պատճառներին ու անհատներից, երեւի նրանք դպրոցում նաեւ նման ուսուցիչնե՞ր են ունեցել …
Գոհար ՀԱԿՈԲՅԱՆ
Լուսանկարը՝ animalist.ru-ի
Կյանքումս տեսած ամենանողկալի տեսանյութներից էր: Հարգելի Գոհար Հակոբյան. գրեք նաև հանձնաժողովի այն անդամների անունները և պաշտոնները, ովքեր “միաձայն” կողմ են քվեարկել: