Արմեն Աշոտյան. 2025 թ. բոլոր դպրոցները ներառական կրթություն կիրականացնեն (Տեսանյութ) 

Արմեն Աշոտյան. 2025 թ. բոլոր դպրոցները ներառական կրթություն կիրականացնեն (Տեսանյութ) 

Այսօր մեկնարկեց Պետական մանկավարժական համալսարանի կազմակերպած «Ներառական կրթություն. ժամանակակից հիմնախնդիրներն ու մարտահրավերները» խորագրով միջազգային գիտաժողովը, որին մասնակցում է 10 երկրի 100-ից ավելի մասնագետ:

Կրթության եւ գիտության նախարար Արմեն Աշոտյանը նշեց, որ ներառական կրթության խնդիրը վերջերս կրկին հանրային քննարկումներ օրակարգ է մտել. «Արդյունքում նախապատրաստել ենք գործողությունների ազգային ծրագիր, համաձայն որի՝ 2025 թ. Հայաստանի բոլոր դպրոցները պետք է ունենան ներառական կրթություն կազմակերպելու կարողություն: Կրթությունն է այն բացառիկ գործիքը, որի միջոցով հնարավոր է հազարավոր երեխաների հասարակություն վերադարձնել որպես լիարժեք մարդ»,-ասաց նախարարը:

ashotyan-2

Աշխատանքի եւ սոցիալական հարցերի նախարարն էլ համոզմունք հայտնեց, որ ներառական կրթության ներդնումը ճիշտ ճանապարհով է ընթանում. «Բոլորիս խնդիրն է՝ համապատասխան հնարավորություններ ստեղծել այն անձանց համար, որոնք որոշակի խնդիրների պատճառով չեն օգտվում որոշ իրավունքներից: Սոցիալական պաշտպանության ոլորտում իրականացվող քաղաքականությունը ներառում է թե կրթական, թե առողջապահական հարցերի կարգավորում»,-հավելեց Արտեմ Ասատրյանը:

ashotyan_1

Գիտաժողովի մասնակիցները կքննարկեն կրթության առանձնահատուկ պայմանների կարիք ունեցող անձանց որակյալ կրթության, սոցիալիզացիայի խնդիրները, ինչպես նաեւ կնախանշեն անելիքները:

Ի դեպ, Մանկավարժական համալսարանում 4 տարի առաջ ստեղծվել է հատուկ կրթության ֆակուլտետը, մինչ այդ էլ ԲՈՒՀ-ում պատրաստվում էին համապատասխան մասնագետներ: Իսկ առաջինը ներառական կրթություն կիրառեց Դ. Դեմիրճյանի անվան թիվ 27 դպրոցը՝ 2005 թվականին:

Լուիզա ՍՈՒՔԻԱՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք