Հոկտեմբերի 3-ին ԼՂՀ Ազգային ժողովում տեղի է ունեցել ՀՀ Սահմանադրական դատարանի նախագահ, Սահմանադրական բարեփոխումների մասնագիտական հանձնաժողովի նախագահ Գագիկ Հարությունյանի եւ նույն հանձնաժողովի անդամ, ԵՊՀ իրավագիտության ֆակուլտետի դեկան Գագիկ Ղազինյանի հանդիպումն Արցախի օրենսդիր, գործադիր եւ դատական իշխանությունների ներկայացուցիչների հետ:
Ողջունելով հանդիպման մասնակիցներին՝ ԼՂՀ Ազգային ժողովի նախագահ Աշոտ Ղուլյանը նշել է Արցախում ՀՀ Սահմանադրական բարեփոխումների գործընթացի հանդեպ հետաքրքրությունը եւ այս տեսանկյունից կարեւորել է նշված թեմային իրազեկումը Արցախի պետական եւ հանրային շրջանակներին:
Գագիկ Հարությունյանի բանախոսությունը նվիրված էր սահմանադրական կարգի տեսությանն ու միջազգային փորձին, ինչպես նաեւ ՀՀ-ում սահմանադրական բարեփոխումների անցկացման անհրաժեշտությանը, առաջարկվող հայեցակարգին ու ներկայացված նախագծին: ՀՀ Սահմանադրական դատարանի նախագահը նշել է, որ նույնիսկ անկախ բարեփոխումների վերաբերյալ հանրաքվեի արդյունքներից, քննարկումների ընթացքը կարեւոր է հայ իրականության մեջ սահմանադրական մտածողության ու մշակույթի զարգացման տեսանկյունից:
Գագիկ Ղազինյանի ելույթի թեման հիմնականում վերաբերում էր դատական համակարգում առաջարկվող բարեփոխումներին, դրանց հիմնավորումներին եւ գործող կարգի հետ նախագծի համեմատությանը:
Կարդացեք նաև
Հանդիպման ավարտին բանախոսները պատասխանել են հանդիպման մասնակիցների հարցերին եւ անհրաժեշտ պարզաբանումներ տվել բարձրացված թեմաներով:
ԼՂՀ Ազգային ժողովի մամուլի ծառայություն
