Արդեն երրորդ տարին է, որ ՀՀ մշակույթի նախարարության որոշմամբ գրադարանավարի օրը նշվում է հոկտեմբերի 7-ին նախորդող շաբաթ օրը, որպեսզի իրենց տոնի կապակցությամբ գրադարանավարները չաշխատեն մինչ ուշ երեկո: Հիշեցնենք, որ հոկտեմբերի 7-ը ՀՀ կառավարության որոշմամբ 2004-ից է նշվում որպես գրադարանավարի օր:
«Առավոտի» հետ զրույցում Ավ. Իսահակյանի անվան կենտրոնական գրադարանի տնօրեն, ՀՀ մշակույթի վաստակավոր գործիչ Հասմիկ Կարապետյանն ասաց, որ Երեւանի քաղաքապետարանի գրադարանների զարգացման ծրագրով հիմնանորոգման են ենթարկվել Իսահակյանի անվան գրադարանային համակարգի բոլոր մասնաճյուղերը (դրանք 7-ն են): «Հրաշալի պայմաններ են ստեղծվել եւ գրականության պահպանման, եւ աշխատակիցների ու ընթերցողների համար»,- հավելեց տիկին Կարապետյանը: Հավաստիացրեց նաեւ, թե եկող տարի սպասվում է գույքի եւ տեղեկատվական նորագույն սարքավորումներով գրադարանները համալրելու ծրագիր:
Դիտարկմանը՝ ողջունելի է, որ գրադարանավարի տոնի նախօրեին արդեն խոսվում է մշակութային այդ օջախների օրեցօր բարելավվող պայմանների եւ զարգացման նոր ծրագրերի մասին, իսկ հանրապետությունում ամենացածրը համարվող գրադարանավարի աշխատավարձի վերանայման մասին հույս կա, որ երբեւէ այն կբարելավվի, Հասմիկ Կարապետյանը պատասխանեց, թե հարցը մինչ օրս առկախ է, բայց հույս ունի, որ կվերանայվի:
Կարդացեք նաև
Իմիջիայլոց, երբեմն արվեստագետներն ասում են, թե կոնկրետ՝ Իսահակյանի անվան գրադարանը մի ամբողջ նախարարության աշխատանք է կատարում (թեեւ նախարարությունը միջոցառումներ կազմակերպող ու անցկացնող կազմակերպություն չէ), փաստելով այն իրողությունը, որ կենտրոնական գրադարանում ու վերջինիս մասնաճյուղերում մշտապես անպակաս են զանազան մշակութային միջոցառումները՝ գրքերի շնորհանդեսներ, հանդիպումներ գրողների հետ եւ այլն: Հաճախ կազմակերպվում են նաեւ երաժշտարվեստի տարբեր ժանրերը ներկայացնող ցերեկույթներ ու երեկույթներ, «Իսահակյան» թատերախմբի ներկայացումները:
Մեր զրուցակիցը ներկայացրեց հոկտեմբերի 3-ին կայանալիք 18 միջոցառումները: Կենտրոնական գրադարանում տարբեր ժամերին կկայանան «Իսահակյան» թատերախմբի մատուցմամբ «Խաղում ենք Իսահակյան» բեմադրությունը, երգչուհի, Երեւանի Կոմիտասի անվան պետական կոնսերվատորիայի պրոֆեսոր Մարգարիտ Շահինյանը հանդես կգա «Արեւմտյան Հայաստանի ավանդական երգերը» դասախոսությամբ, մանկական բաժնում նախատեսված է մուլտֆիլմերի դիտում, հեքիաթի ընթերցում, հայկական ազգային խաղերի ուսուցում եւ այլն: Իսահակյան պուրակում էլ, որ գտնվում է գրադարանի ներսում, կանցկացվի գրքային ցուցահանդես-նվիրատվություն՝ «Գրադարանը նվիրում է» խորագրով:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
03.10..2015
