ՀԱԿ փոխնախագահ Լեւոն Զուրաբյանը «Սիվիլնեթ»-ի հետ զրույցում Վանաձորի քաղաքապետի նկատմամբ հարուցված քրեական գործը համարել է քաղաքական հետապնդում:
«Վիճակագրական վերլուծությունը ցույց է տալիս, որ Վանաձորում եղել են ամենալավ ընտրությունները: Վանաձորում, փաստորեն, ընդհանրապես կեղծիք չի եղել, եւ պատահական չեմ համարում, որ հենց հանրաքվեից հետո Վանաձորի քաղաքապետի նկատմամբ քրեական գործ է հարուցվել: Ակնհայտ է, որ սա քաղաքական հետապնդում է հենց այն պատճառով, որ նա ոչինչ չի արել ընտրությունները կեղծելու համար»,- ասել է Լեւոն Զուրաբյանը:
Aravot.am-ը քաղաքապետ Սամվել Դարբինյանից հետաքրքրվեց՝ արդյոք իսկապես նրա դեմ հարուցված քրեական գործը հանրաքվեի օրը «վատ» աշխատելու ու պարտության արդյունք էր: «Քաղաքական հետապնդում դա չի կարող լինել: Դա ընդհանրապես կապ չունի ընտրությունների հետ: Ոչ էլ քաղաքապետի վրա է քրեական գործ հարուցված: Ինչ-որ մեկի բողոքի հիման վրա ընդամենը գործ է հարուցված, բայց դա քաղաքապետի վրա չէ: Ընդամենը պետք է քաղաքացու բողոքը հետաքննության ընթացքում պարզաբանվի»,- ասաց քաղաքապետն ու անջատեց հեռախոսը:
Հիշեցնենք, որ նոյեմբերին Վանաձորի բնակիչ Վիկտոր Դարբինյանը Լոռու մարզի դատախազություն բողոք էր ներկայացրել իր ազգականի՝ Վանաձորի քաղաքապետ Սամվել Դարբինյանի դեմ: Նա իրավապահներին հայտնել էր, որ քաղաքապետի մերձավոր շրջապատն իրենից ցանկանում է խլել թիվ 1 երթուղին: Լոռու մարզի դատախազությունում որոշում է կայացվել քաղաքապետի դեմ ներկայացված բողոքի հիման վրա քր.գործ հարուցել՝ ՀՀ քրեական օրենսգրքի 309 հոդվածի հատկանիշներով (պաշտոնեական լիազորությունները չարաշահելը):
Կարդացեք նաև
Արփինե ՍԻՄՈՆՅԱՆ
