«ՀՀ Տնտեսական մրցակցության պաշտպանության պետական հանձնաժողովը ՀՀ բարձրաստիճան պաշտոնատար անձանց էթիկայի հանձնաժողով է ներկայացրել հարցի վերաբերյալ իր դիրքորոշումը»,-Aravot.am-ի հարցին պատասխանեցին ՏՄՊՊՀ-ից:
Հարցրել էինք, թե պարոն Շաբոյանն ինչպե՞ս է մեկնաբանում, որ «Մարաթուկ Հոլդինգ» ընկերության նախագահ Տիգրան Վարդանյանը դիմել է ՀՀ բարձրաստիճան պաշտոնատար անձանց էթիկայի հանձնաժողով՝ ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանի կողմից էթիկայի կանոնների խախտման վերաբերյալ, Էթիկայի հանձնաժողովն էլ «Մարաթուկի» դիմումի հիման վրա հարուցել է վարույթ:
ՏՄՊՊՀ-ից նաեւ ասացին, որ հանձնաժողովն իր ամբողջական պատասխանը, ինչպես նաեւ դիտարկումները կհրապարակի էթիկայի հանձնաժողովի եզրակացությունը ստանալուց հետո:
Hetq.am ինտերնետային կայքը տեղեկացրել էր, որ «Մարաթուկ Հոլդինգ» ՍՊԸ-ի տնօրեն Տիգրան Վարդանյանը դիմել է Էթիկայի հանձնաժողով` հայտնելով, որ ՏՄՊՊՀ նախագահ Արտակ Շաբոյանը 2015թ. հունիսի 20-ին Ծաղկաձորում հանդես է եկել հայտարարությամբ` ասելով, որ տուրիստական կազմակերպությունները փաթեթային էժան առաջարկներ են գովազդում, իսկ երբ քաղաքացին այցելում է նրանց գրասենյակներ, ասում են, որ էժան փաթեթներն արդեն սպառվել են եւ «ստիպում» օգտվել թանկ փաթեթից:
Կարդացեք նաև
Պարոն Շաբոյանը նաեւ նշել էր, որ բուկլետներում տեղադրում են գեղեցիկ վայրերի, քաղաքների լուսանկարներ եւ միայն տեղ հասնելուց է անձը, քաղաքացին պարզում, որ իրեն խաբել են եւ նման հնարավորություն ինքը չի ունենալու:
Որպես օրինակ, ՏՄՊՊՀ ղեկավարը նշել էր «Մարաթուկ» ընկերությանը, ասելով, որ իրենց հանձնաժողովը վարչական վարույթ է հարուցել, քանի որ այս ընկերությունը մոլորեցրել է քաղաքացիներին`բուկլետներում ներառելով իբր Կրետե կղզու լուսանկարը, որն իրականությանը չի համապատասխանել:
«Մարաթուկ Հոլդինգ» ՍՊԸ-ի տնօրեն Տիգրան Վարդանյանը Էթիկայի հանձնաժողովին իր դիմումը հիմնավորել է, որ պետական մարմինները եւ դրանց պաշտոնատար անձինք պարտավոր են հարգել առեւտրային իրավաբանական անձանց գործարար համբավը եւ վարչաիրավական հարաբերություններում «անմեղության կանխավարկածի» սկզբունքը: Ըստ Տիգրան Վարդանյանի, քանի դեռ չկա ուժի մեջ մտած անբողոքարկելի վարչական ակտ, ուստի այդ պայմաններում «Մարաթուկ Հոլդինգ» ՍՊԸ-ին իրավախախտ ներկայացնելու Արտակ Շաբոյանի հրապարակային հայտարարությունը նսեմացնում է կոլեգիալ մարմնի դերը, ինչպիսին ՏՄՊՊՀ-ն է:
Լուսինե ԲՈՒԴԱՂՅԱՆ
