Հայաստանի և Արցախի 112 թանգարաններ այսօր մինչև կեսգիշեր բաց կլինեն այցելուների համար: «Թանգարանների գիշեր» համաեվրոպական միջոցառումը մեր հանրապետությունում արդեն 11-րդ անգամ է անցկացվում: Թանգարանների միջազգային խորհրդի՝ ԻԿՕՄ–ի առաջարկով մշակութային միջոցառումն այս տարի անցկացվում է «Թանգարանները և մշակութային լանդշաֆտները» կարգախոսի ներքո:
Հաշվի առնելով, որ մայրաքաղաքի թանգարաններից մշակութային լանդշաֆտ ունի միայն «Էրեբունի» պատմահնագիտական արգելոց–թանգարանը՝ Երևանի հինգ թանգարաններ իրենց ինքնատիպ նմուշները ներկայացնում են հենց «Էրեբունի» թանգարանի տարածքում:
«Էրեբունի» պատմահնագիտական արգելոց–թանգարանի տնօրեն Գագիկ Գյուրջյանի խոսքով՝ վերջին տարիներին այցելուների վերաբերմունքը թանգարանների նկատմամբ զգալիորեն փոխվել է. «Եթե մի քանի տարի առաջ վազվզում, բարձրանում էին պատերի վրա, քանդում էին, հիմա այդպիսի բաներ գրեթե չկան: Ոչ միայն չեն փչացնում, այլև նույնիսկ տիրություն են անում»,- «Տեսակետ» մամուլի ակումբում այսօր լրագրողների հետ հանդիպման ժամանակ ասաց Գագիկ Գյուրջյանը:
Ի դեպ, նա նաև տեղեկացրեց, որ Էրեբունի հնավայրի ուրարտական ժառանգությունն ապրիլին հայերենով, պարսկերենով և անգլերենով ներկայացվել է Իրանի Շիրազ քաղաքի Պերսեպոլիս պատմահնագիտական արգելոցում. «Բացառիկ ցուցադրություն էր, որը ջերմ ընդունելության արժանացավ: 19 պաստառներ էին, որոնց վրա գիտահանրամատչելի կերպով ներկայացված էին Էրեբունի, Թեյշեբաինի և Արգիշտիխինիլի հնավայրերը՝ իրենց պատմությամբ, մշակույթով, կենցաղով»,- ասաց Գ. Գյուրջյանը:
Կարդացեք նաև
Սիրանուշ ՀԱՅՐԱՊԵՏՅԱՆ
