Ինչպես ավելի վաղ հայտնել էինք, Կառավարության նիստերի դահլիճում այսօր կայացավ «Ալյանս» առաջադիմական ցենտրիստական կուսակցության երկրորդ արտահերթ համագումարը:
Քվեարկությամբ հաստատվեց, որ «Ալյանսը» մասնակցելու է առաջիկա ՏԻՄ ընտրություններին: Կուսակցության անդամների մեծամասնությունը նաեւ դեմ չեղավ, որ «Ալյանսը» 2017թ. խորհրդարանական ընտրություններին այլ քաղաքական ուժերի հետ հնարավոր դաշինք կազմի: Հայտարարվեց, որ աշնանը կայանալիք Վանաձորի քաղաքապետի ընտրություններում «Ալյանսն» առաջադրելու է «Լոռեցիների միավորման» նախագահ Մենուա Բրուտյանի թեկնածությունը:
Ելույթում Մենուա Բրուտյանն ասաց. «Աշնանը կայանալիք ՏԻՄ ընտրություններում կանխորոշվելու է վանաձորցիների ապագան: Քաջատեղյակ եմ տարիների ընթացքում իշխանության անգործության արդյունքում կուտակված խնդիրների մասին` անօրինական որոշումներ, ապօրինի գործողություններ, անարդյունավետ կառավարում քաղաքապետարանում, ֆինանսական միջոցների վատնում, ստվերային տնտեսություն: Այս ամենի արդյունքում ունենք քանդված եւ քանդվող փողոցեր ու շինություններ, մութ, կեղտոտ, անշուք դարձած Վանաձոր, որտեղ մարդիկ ապագա չեն տեսնում եւ գաղթում են»:
Բրուտյանը հավելեց, որ պարտավորվում է վերականգնել արդարությունը, վերջ դնել կոռուպցիային եւ ապօրինություններին, արմատախիլ անել ստվերային տնտեսությունը, վերահսկել համայնքային բյուջեն, ծառայել բնակիչերի բարեկեցության բարելավման գործին:
Կարդացեք նաև
Լուիզա ՍՈՒՔԻԱՍՅԱՆ
