«ՓՄՁ համագործակցության ասոցիացիա» հասարակական կազմակերպության ղեկավար Հակոբ Ավագյանը մայիսի 31-ին լրագրողների հետ հանդիպման ընթացքում անդրադարձավ էկոնոմիկայի նախարար Արծվիկ Մինասյանի հայտարարությանը, թե հնարավոր է` շաքարավազի մենաշնորհ ճանաչեն, բայց նաեւ նրա առաջ պայմաններ դնեն:
Հակոբ Ավագյանն ասաց, որ շրջանառության հարկ վճարող գերփոքր բիզնեսը ապահովել է հարկային եկամուտների 1 տոկոսը: Իսկ դա նշանակում է, որ պետական ապարատը, երբ տեսնում է, որ գերփոքր բիզնեսը կազմում է մոտավորապես 60 տոկոս, բայց իրենք ապահովում են 1-2 տոկոս հարկային եկամուտ, նշանակում է իրենք դերակատար չեն:
«Հետեւաբար, երբ մենք օրենքի տեսքով թույլ տանք լինի օրենքով սահմանված մենաշնորհ, մենք ամբողջ ազգով կախված ենք լինելու նրանից, թե այդ մարդը հարկ կվճարի՞, թե՞ չի վճարի: Կամ մի օր ինքը կջղայնանա, կորոշի, որ այդ գործը ինքն էլ չի անելու, նշանակում է երեք ամիս պետական բյուջեն լուրջ դիսբալանս է ապրելու: Այսինքն՝ եթե մեր հարկային եկամուտների 2 տոկոսն ապահովում է մոտ 60 հազար հարկատու, որը դիվերսիֆիկացված է, աշխարհը գնում է դրան:
Որ մեկի փակումից, մեկի բացումից, մեկի խռովելուց բյուջեն ռեզոնանս չապրի: Այսինքն՝ եթե մենք դրան չենք գնում, հակառակը՝ ասում ենք՝ փող կաշխատես, այսքան հարկ կտաս, ինքն էլ ասում է՝ կտամ, բայց մի օր որոշում է չտալ: Սա նշանակում է՝ ինքը հավասար է այն լիազորությունների, որը ցանկացած պահի կարող է ազդել պետական բյուջեի եկամուտների վրա, իսկ դա շատ լուրջ ցուցանիշ է»,- ասաց Հակոբ Ավագյանը:
Ամի ՉԻՉԱԿՅԱՆ
