Մալաթիա-Սեբաստիա վարչական շրջանների ընդհանուր իրավասության առաջին ատյանի դատարանում Հեղինե Դարբազյանի սպանության գործի քննությունից հետո գործով տուժողի իրավահաջորդի ներկայացուցիչ Սեդա Սաֆարյանը լրագրողներին հայտնեց, որ կարծում է՝ իրենց ներկայացրած 2 միլիոն դրամ նյութական վնասի պահանջը ողջամիտ է:
«2 միլիոն դրամը լրացել է գերեզմանի ծախսերի լրացմամբ: Այս տեսանկյունից՝ պաշտպանի ներկայացրած առարկությունները հիմնավոր չեն եւ չեն բխում գործող թե՛ օրենսդրության պահանջներից եւ թե՛ նախադեպային որոշումներով կայացված որոշման չափի պահանջներից»,- ասաց նա:
Ըստ Սեդա Սաֆարյանի, կողմի առաջարկած 800 հազար դրամի մեջ ներառվում է թաղման ժամանակ եւ թաղման հաջորդ օրը կատարած որոշակի ծախսեր, սակայն դրա մեջ չի ներառում շատ ավելի առաջնային բաներ: Հիշեցնենք, որ Արտակ Առաքելյանը որսորդական դանակով բազմաթիվ հարվածներով սպանել է նախկին կնոջը՝ 38-ամյա Հեղինե Դարբազյանին:
Սեդա Սաֆարյանը անդրադարձավ նաեւ մեղադրական եզրակացությանը եւ այն հանգամանքին, որ մեղադրողը ցանկություն հայտնեց փոփոխություններ կատարել եզրակացությունում. «Ես անհամաձայնություն ունեմ մեղադրական եզրակացության փաստական հանգամանքների հիմքում դրված փաստերի առումով: Ես գտնում եմ, որ ամուսնական անհավատարմության մասին մեղադրական եզրակացության մեջ ներառված հասկացությունը չունի լուրջ փաստական եւ իրավական հիմնավորումներ:
Կարդացեք նաև
Եվ այս տեսանկյունից կարծում եմ, որ առավել մոտ է այս շարժառիթներին փաստական տվյալը, որ չի համակերպվել կնոջ բաժանվելու մտքի հետ եւ անհանդուրժողականություն է դրսեւորել կնոջ կողմից առաջ քաշված տվյալի կապակցությամբ: Դա էլ հանգեցրել է սպանության կատարմանը: Մեղադրողի հետ չզրուցեցինք, թե ինչ է փոխելու, բայց կարծում եմ՝ ամուսնական անհավատարմության վերաբերյալ գործով դատաքննության ընթացքում ապացույցների ձեռք չբերումը իրեն եւս բերել է այն համոզման, որ մեղադրանքի ձեւակերպումների մեջ ինչ-որ բան փոխվի»:
Ամի ՉԻՉԱԿՅԱՆ
