Հայաստան-Վրաստան միջպետական ավտոճանապարհի մաս կազմող Ոսկեպար-Բաղանիս ճանապարհի մի հատված գտնվում է սահմանի անմիջական հարեւանությամբ, ադրբեջանական դիրքերի դեմ-դիմաց: Այդ տեղանքում ադրբեջանական հենակետերը շատ մոտ են մեր պաշտպանական դիրքերին եւ միջպետական ավտոճանապարհին: Ճանապարհի տվյալ հատվածը պարբերաբար գնդակոծվում է ադրբեջանական զինուժի կողմից: 2015թ. նոյեմբերի 5-ին նշված տեղում ադրբեջանական գնդակոծությունից վնասվեց ռուսական մեծ բեռնատար:
Ներկայումս Ալավերդի-Վանաձոր ավտոճանապարհին վերանորոգման աշխատանքներ են կատարվում, այն սեպտեմբերի 14-ից փակ է երթեւեկի համար: Բագրատաշենից դեպի Երեւան ուղեւորվող բեռնատարները մայրաքաղաք են հասնում Բաղանիս-Ոսկեպար սահմանամերձ ճանապարհով: Գործում է նաեւ Բաղանիս-Ոսկեպար շրջանցիկ ավտոճանապարհը: Սահմանագոտին շրջանցող այդ ճանապարհին առկա սողանքի հետեւանքները վերացնելու համար վերջերս պետական բյուջեի ֆինանսավորմամբ աշխատանքներ կատարվեցին: Սակայն սահմանագոտին շրջանցող ճանապարհի ոլորանները նեղ են խոշոր բեռնատարների համար: Բացի այդ, շրջանցիկ ավտոճանապարհի ասֆալտի ծածկը բարակ է, 40 տոննա բեռով մեծ բեռնատարները իրենց ծանրությամբ շարքից հանում են ճանապարհի ծածկը: Շրջանցիկ ճանապարհն ամբողջությամբ չի ապահովում երթեւեկի անվտանգությունը, այդ ճանապարհի առանձին հատվածներ ադրբեջանական զինուժի ուղիղ նշանառության գոտում են:
Միջպետական ավտոճանապարհի Ոսկեպար-Բաղանիս հատվածը ադրբեջանական հենակետերի կրակից, ազերի զինյալների տեսանելիությունից պաշտպանելու համար հարկավոր է ճանապարհի եզրին քարաբեկորներից պատ շարել կամ հողի, խճի կույտերից թմբեր կառուցել: Հավելեմ, որ 1990-ական թվականներին նշված հատվածում թմբեր էին կառուցված: Պաշտպանիչ պատի կամ թմբերի կառուցումը հարկ է անել մառախլապատ օրերին, երբ ճանապարհին աշխատողները տեսանելի չեն լինի ադրբեջանական հենակետերից:
Ադրբեջանցիները 2015թ. Ղազախի շրջանի Մազամ գյուղի ավտոճանապարհը պաշտպանող քարե երկար պատ են կառուցել: Իսկ Հայաստան-Վրաստան միջպետական ճանապարհի Ոսկեպար-Բաղանիս հատվածը ադրբեջանական զինուժի համար խոցելի է մնում՝ չնայած խնդրի մասին վաղուց է բարձրաձայնվում:
Կարդացեք նաև
Ոսկան ՍԱՐԳՍՅԱՆ
