Իրավապահ մարմինները շարունակում են «Առավոտի» կայքում հրապարակված հաղորդագրությունների համար պատասխան պահանջել մեզնից:
Միայն մի՝ «Համատարած ընտրախախտումներ Վանաձորում և Գյումրիում ընթացող ՏԻՄ ընտրություններին. Զեկույց» հրապարակման վերաբերյալ արդեն 6 գրություն ենք ստացել՝ 5-ը ՀՀ ոստիկանության Շիրակի մարզային վարչությունից, 1-ը՝ ՀՀ քննչական կոմիտեի Շիրակի մարզային քննչական վարչությունից:
Վերջինիս ավագ քննիչ Խ. Նազարյանը հոկտեմբերի 4-ին թվագրված պաշտոնական նամակով տեղեկացնում է. «02.10.2016թ. Շիրակի մարզի դատախազությունից թիվ 64/20-1/117-16 գրությամբ ուղարկվել է Aravot.am կայքէջում տպագրված «Համատարած ընտրախախտումներ Վանաձորում և Գյումրիում ընթացող ՏԻՄ ընտրությունների զեկույց» հոդվածի պատճեն այն մասին, որ թիվ 34/78 ընտրատեղամասում «Գյումրիի տուն-ինտերնատի» շահառուների քվեարկությունը սահմանված կարգի խախտմամբ է կազմակերպվել։
Փաստի առթիվ Շիրակի մարզային քննչական վարչությունում նախապատրաստվում են նյութեր։
Կարդացեք նաև
Նախապատրաստված նյութերի անհրաժեշտությունից ելնելով խնդրվում է տրամադրել կայքում տեղ գտած վերը նշված ինֆորմացիայի աղբյուրը, հայտնել, թե կոնկրետ ինչ ընտրակարգ է խախտվել, կոնկրետ ում հետ է կապված եղել նշված դեպքը, հայտնել անուն ազգանուն և անձնագրային այլ տվյալներ, ինչպես նաև խնդրվում է տրամադրել նշված նյութին վերաբերող լրացուցիչ այլ տեղեկություններ»:
Իսկ ՀՀ ոստիկանության Շիրակի մարզային վարչության Գյումրի քաղաքի Մուշի բաժնից փոխգնդապետ Ա. Մարտիրոսյանից ստացված 5 նամակները դրվագ առ դրվագ անդրադառնում են վերոհիշյալ հրապարակման մեջ նշված տարբեր փաստերին: Մի օրինակ. «Ձեր կայքէջում 02.10.2016թ. տպագրված «Համատարած ընտրախախտումներ Վանաձորում և Գյումրիում ընթացող ՏԻՄ ընտրություններին. զեկույց» հոդվածում նշված այն տեղեկության վերաբերյալ, որ Գյումրիի թիվ 34/13 ընտրատեղամասում՝ ՀՅԴ կուսակցության հանձնաժողովի անդամի կողմից կատարվել են քվեարկության մասնակիցներին հետևելու և այդ մասին նշումներ կատարելու վերաբերյալ գործողություններ՝ ոստիկանության Գյումրիի Մուշի բաժնում նախապատրաստվում են ստուգման նյութեր։
Ստուգման նյութերի ընթացքը լուծելու անհրաժեշտությունից ելնելով Ձեզ առաջարկվում է մեզ տրամադրել հիշյալ տեղեկության հիմք ծառայած աղբյուրը՝ հիշյալ տեղեկությունը հաստատող Ձեր մոտ առկա տեսանյութերը , ձայնագրությունները և այլ ապացույցներ»:
Այդպես էլ չենք կարողանում հասկանալ, թե ինչու են իրավապահները զուր ժամանակ վատնում նման գրագրության վրա, երբ նույն հրապարակման վերջում նշված է տեղեկատվության աղբյուրը: Զեկույցը ստորագրել են Հելսինկյան Քաղաքացիական Ասամբլեայի Վանաձորի գրասենյակը, Գորիսի մամուլի ակումբը, Իրազեկ Քաղաքացիների Միավորումը, Հայաստանի Հելսինկյան կոմիտեն ու Մարտունու կանանց համայնքային խորհուրդը: Եվ նրանք էլ թերեւս կարող են պատասխանել «Առավոտին» ուղղված հարցադրումներին, թե ինչ ընտրակարգ է խախտվել կամ հայտնել լրացուցիչ այլ տեղեկություններ ու տրամադրել ապացույցներ:
Նշենք, որ սահմանադրական հանրաքվեից սկսած՝ իրավապահները սովորություն են դարձրել դիտորդների հաղորդած տվյալների համար ԶԼՄ-ներից պատասխան պահանջելը: Եվ չնայած պարբերաբար գրել ենք այն մասին, որ նամակները ճիշտ կլիներ ուղղել ստույգ հասցեատերերին՝ առավել արդյունավետ աշխատանքի համար, իրավապահները շարունակում են գործել նույն ոճով:
