Մայիսի 6-ին Հայաստանում ԵՄ պատվիրակությունը Հայաստանի ազգային կինոկենտրոնի հետ համատեղ կազմակերպել էր Սերգեյ Փարաջանովի «Տրիպտիխ» ֆիլմի ցուցադրությունը։
Միջոցառումը նվիրված էր հայ կինոռեժիսոր, սցենարիստ Սերգեյ Փարաջանովի (1924-1990թթ.) ծննդյան 100-ամյակին։ Փարաջանովը, ով ստեղծել է սոցիալիստական ռեալիզմի սկզբունքներին չհամապատասխանող իր սեփական կինեմատոգրաֆիան, բազմիցս ենթարկվել է հալածանքների խորհրդային իշխանությունների կողմից։
Միջոցառումը, որը կազմակերպել էր Հայաստանում ԵՄ պատվիրակությունը, կոչված էր հարգանքի տուրք մատուցելու «լեգենդար կինոռեժիսորի ժառանգությանը, ում եզակի ստեղծագործությունները հայկական եւ համաշխարհային ժառանգության մաս են կազմում»։
«Տրիպտիխը» Փարաջանովի երեք վերականգնված կարճամետրաժ ֆիլմերի եռերգություն է՝ «Կիեւյան որմնանկարներ», «Հակոբ Հովնաթանյան» եւ «Արաբանախշեր Փիրոսմանիի թեմաներով»։
Կարդացեք նաև
«Կիեւյան որմնանկարները» (1966թ.) խորհրդային իշխանությունների կողմից երկար ժամանակ արգելված կոլաժային ստեղծագործություն է, որը Փարաջանովը հավաքել էր տեսախցիկի նմուշներից՝ ժամանակակից Կիեւում Երկրորդ աշխարհամարտի հետեւանքների մասին չնկարահանված ֆիլմի համար:
«Հակոբ Հովնաթանյան» (1967թ.) ֆիլմը XIX դարի Եվրոպայի լավագույն դիմանկարիչներից մեկի մասին է։
«Արաբանախշեր Փիրոսմանիի թեմաներով» (1985թ.) ֆիլմն էլ պատմում է վրաց հայտնի նկարիչ Նիկո Փիրոսմանիի մասին, ով խթանել է վրացական ավանդական գեղանկարչությունը։
EU NEIGHBOURS east
