Քիչ առաջ ավարտվեց ՀՀԿ գործադիր մարմնի նիստը: ՀՀԿ խոսնակ Էդուարդ Շարմազանովն ասաց, որ նիստում քննարկվել է խորհրդի կազմից ազատել իրենց նախկին գործընկերներին, որոնք դիմում էին գրել կուսակցությունից դուրս գալու դիմում էին գրել:
«Հովիկ Աբրահամյանին, Հենրիկ Աբրահամյանին, Արարատի նախկին մարզպետ Ռուբեն Աբրահամյանին եւ ԱԺ պատգամավոր Կարինե Պողոսյանին: Քննարկել ենք նաեւ ներկուսակցական ու ներքաղաքական հարցեր, քննարկվում է խորհրդարանական ընտրությունների նախընտրական ծրագիրը, այն ավարտական փուլում է, քննարկվել են նաեւ կազմակերպչական հարցեր»,- ասաց պարոն Շարմազանովը:
Անդրադառնալով այսօր Արարատի մարզի երեք գյուղապետերի ներկայացրած դիմումներին, որոնք նույնպես կուսակցությունից դուրս գալու դիմում էին ներկայացրել՝ ասաց. «Ամեն մարդ ինքն է որոշում, ազատ է անդամակցել այս կամ այն կուսակցությանը, դա նրանց իրավունքն է: Մեր կուսակցությունում ե՛ւ արտահոսք, ե՛ւ ներհոսք կա, բայց անհամաչափ, որովհետեւ ներհոսքն ավելի մեծ է: Շնորհակալություն ենք հայտնում մեր բոլոր գործընկերներին երկար տարիների միասնական աշխատանքի համար, այդ թվում պարոն Աբրահամյանին, իրենք են իրենց ճակատագիրը որոշել, մենք հարգանքով ենք վերաբերում իրենց որոշմանը: Մենք մեր ճանապարհն ունենք, իրենք ընտրել են իրենց ճանապարհը, խնդիր չկա, մեկնաբանելու բան չեմ տեսնում»:
Արփինե ՍԻՄՈՆՅԱՆ
