Բթամատերի մասին ֆիլմ. այսպես կարելի է նկարագրել Բրիտանական ֆիլմերի 15-րդ փառատոնի չորրորդ ֆիլմը՝ «Հասուն կյանքի հմտությունները», որը ցուցադրվեց այսօր՝ փետրվարի 21-ին:
Ֆիլմը, որը ցուցադրվում էր փառատոնի շրջանակներում կանանց իրավունքները բարձրացնելու նպատակով, իրականում այդպես էլ հանդիսատեսին չկարողացավ հասցնել իր գաղափարախոսությունը:
«Հասուն կյանքի հմտությունները» սցենարային առումով հում էր: Կային հատվածներ, որ ըստ սցենարի հեղինակի պիտի հանդիսատեսի համար ծիծաղելի լինեին, բայց դահլիճում նստած հանդիսատեսն այդքան էլ չընկալեց դրանք, ու պատճառն ամենևին այն չէր, որ հնարավոր է՝ հանդիսատեսը լավ չէր հասկանում: Այլ ուղղակի առողջ հումորն էր պակասում: Չկար սցենարային հստակ գիծ: Ֆիլմի 50-րդ րոպեն էլ եկավ ու անցավ, բայց այդպես էլ պարզ չդարձավ, թե իրականում ինչ էր ուզում ասել այն: Թվում էր ուղղակի մի մեծահասակի մասին էր, որն ընկերություն էր անում մի երեխայի հետ, գոռում, նորից գոռում նրա վրա, հետո ներողություն խնդրում: Հա ի դեպ, երեխան էլ գլխավոր հերոսուհու տանից որոշ իրեր էր գողացել, ու պարզ էլ չէ՝ ինչի համար:
Գլխավոր հերոսուհու՝ Աննայի կերպարն իսկապես անտանելի էր ու նյարդայնացնող: Չկար նրա կերպարը հետաքրքիր դարձնող ոչ մի հատկանիշ: Թեև հետաքրքիր էր նրա սերը դեպի բթամատերի մասին հոլովակներ նկարելը, որի ընթացքում նրան միշտ, պարտադիր ընդհատում էին: Մեկ այլ անհետաքրքիր կերպար է Բրենդոնը, որն անհույս սիրահարված է Աննային ու անհարմար բաներ էր ասում ողջ ֆիլմի ընթացքում: Ամենահետաքրքիր հերոսը ֆիլմում Աննայի տատիկն էր, որի մեկ կամ երկու կատակի վրա հնարավոր է՝ հանդիսատեսը ժպտաց:
Կարդացեք նաև
1 ժամ 20 րոպե հետո վերջապես հնչում է մի, կամ, կարելի է ասել, ֆիլմի միակ արտահայտությունը, որ մտածելու տեղիք է տալիս.
«Գոյություն ունի՞ մեկ այլ աշխարհ: Զուգահեռ մի աշխարհ, որտեղ գնում ենք, երբ այս կյանքում ամեն ինչ ավարտվում է»,- հարցնում է Աննան ինքն իրեն:
Ողջ ֆիլմը «Տիտանիկ» նավի պես խորտակվելուց համարյա փրկեցին անդրադարձները «Հպարտություն և նախապաշարմունքներ» գրքին ու Ռոբերտ Փեթինսոնին և ակումբում տեղի ունեցող մի հատվածի նկարահանման բարձր որակն ու գույները:
Սակայն… մոռացեք նախորդ պարագրաֆը, դրանք էլ չփրկեցին ֆիլմը:
https://www.youtube.com/watch?v=cyEe6cXU-v8
Մելանի ՍԱՐԳՍՅԱՆ
