Ռիշար Կլայդերման. «Հույս ունեմ՝ հաջորդ այցի ժամանակ կկատարեմ նաև Ձեր երկրի երաժշտությունը» (Տեսանյութ)

Ռիշար Կլայդերման. «Հույս ունեմ՝ հաջորդ այցի ժամանակ կկատարեմ նաև Ձեր երկրի երաժշտությունը» (Տեսանյութ)

Ֆրանսիացի հանրահայտ դաշնակահարը Հայաստանում է արդեն երկրորդ անգամ։ Մարտի 17-ին տեղի ունեցավ նրա մամուլի ասուլիսը։ Լրագրողներին տեղեկացրին, որ սպասվող համերգի ընթացքում կհնչեն նոր ստեղծագործություններ, որոնք կտարբերվեն նախորդ անգամվա ծրագրից։

Համերգին կհնչեն հանրահայտ Show time Murmurs, L for Love, Chariots of fire, Ballade pour Adeline, Corazon de Nino, Love at first sight, Childhood memories, Cinema Paradiso, Spartacus, Romeo and Juliet, Blue Rondo, America և այլ ստեղծագործություններ։

Փոլյուդ Սենեվիլի գրած «Բալլադ Ադելինի համար» ձայնասկավառակի թողարկումը Կլայդերմանին հանրահայտ դարձրեց ողջ աշխարհում, այն վաճառվեց աշխարհի ավելի քան 30 երկրներում 22 մլն․օրինակով: «Ես սկսել եմ դասական երաժշտությունից և անցումը պոպուլյար երաժշտությանը շատ բնական է եղել: Իսկ այս ստեղծագործությունը կոմպոզիտորը գրել է իր աղջկա՝ Ադելինի մասին, որը հիմա արդեն ունի իր երեխաները», – նշում է դաշնակահարը:

Կլայդերմանը ձայնագրել է ավելի քան 1300 մեղեդի, ստեղծել նոր երգացանկ՝ միավորելով դասական և փոփ երաժշտությունը

Դաշնակահարը նշվել է համաշխարհային ռեկորդների Գինեսի գրքում՝ որպես «աշխարհի ամենահաջողակ դաշնակահար»:

«Երաժշտությունը այն սերն է, որ 38 տարի պահում է ինձ այս գործում; Շնորհակալ եմ բոլորիդ այն սիրո համար, որ ունեք իմ և երաժշտության հանդեպ: Հույս ունեմ՝ հաջորդ այցի ժամանակ կկատարեմ նաև Ձեր երկրի երաժշտությունը»,-խոստացավ աշխարհահռչակ երաժիշտը:

Համերգը տեղի կունենա մարտի 18-ին Կ․ Դեմիրճյանի անվան մարզահամերգային համալիրում:

Մարիամ ԽԱՉԱՏՐՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք