Իրավապաշտպան Արթուր Սաքունցի գնահատմամբ, նախընտրական քարոզչությունը Հայաստանում ընթացավ ոչ թե ծրագրերի ու գաղափարների քննարկման տիրույթում, այլ հիմնական դերակատարում ունեցավ գովազդը, ընթացավ բովանդակազուրկ խոստումներով, վարչական ռեսուրսների խախտումներով, քրեորեն հետապնդվող արարքներով:
«ԿԸՀ-ն, ըստ էության, մատնված էր անգործության, որովհետեւ մատը մատին չխփեց ընթացք ու գնահատական տալու, կանխելու, որի պարտավորությունն ուներ: Սա է տխուր պատկերը»,- այս կարծիքին է պարոն Սաքունցը:
Արթուր Սաքունցի խոսքով, քարոզչությունը չընթացավ ՀՀ համար կենսական նշանակություն ունեցող քաղաքական, սոցիալական, ժողովրդավարական, տնտեսական ու տարբեր բնագավառների տեսական ու հրատապ խնդիրների լուծման առաջարկների ուղղությամբ, այլ ամբողջ այս քարոզարշավի ընթացքում ականատես եղանք տարբեր խախտումների արձանագրումների: Իրավապաշտպանը նաեւ պատգամավորի թեկնածուների պասիվություն է արձանագրել, հատկապես չի տեսել բանավեճեր. «Արձանագրում եմ, որ ՀՀ ընտրողը հնարավորություն չունեցավ մեկտեղ ականատես լինել տարբեր թեկնածուների ու կուսակցությունների կարծիքների բախմանը, որի հիման վրա կարող էինք եզրակացություն անել»:
Ըստ նրա, նախընտրական ողջ քարոզչության ընթացքում այդպես էլ պատշաճ ուշադրություն չդարձվեց պատգամավորի թեկնածու Անդրիաս Ղուկասյանի՝ անազատության մեջ գտնվելու հանգամանքին. «Առաջադրված թեկնածուներից մեկը գտնվում է անազատության մեջ, նրա հարցը քաղաքական ենթատեքստ ունի, փաստացի թեկնածուն հնարավորություն չի ունեցել իր կարծիքը հայտնել, սա պետք է մտահոգիչ լիներ թեկնածուների համար, որ իրենցից մեկը անհավասար պայմաններում է գտնվում կամ Սամվել Բաբայանի նկատմամբ հարուցված կասկածելի քրեական գործը, զենքի գործադրմամբ հաշվեհարդարը առանձին բնակավայրերում, երեկվա ԿԸՀ խայտառակ որոշումը, որով մերժվեց ԵԼՔ դաշինքի դիմումը»:
Կարդացեք նաև
Արփինե ՍԻՄՈՆՅԱՆ
