ԵԽԽՎ նախագահ Պեդրո Ագրամունտն անակնկալ մատուցեց ԵԽԽՎ բյուրոյի անդամներին և խախտեց բոլոր պայմանավորվածությունները: Նա քաղաքական խմբերի հետ ձեռք էր բերել պայմանավորվածություն, որ ինքը դիմավորելու է Իսպանիայի թագավորին և հաջորդ օրը հրաժարական տա:
Նախորդ օրերին ԵԽԽՎ պատվիրակների մեծամասնությունը վստահ էր, որ այսօր Ագրամունտը հրաժարականի մասին հայտարարություն է անելու, սակայն նա անգամ չէր մասնակցում Բյուրոյի նիստին:
Քիչ առաջ ավարտվեց Բյուրոյի նիստը, հենց որի ընթացքում էլ նախատեսվում էր, որ այսօր Ագրամունտը հայտնելու է իր հրաժարականի մասին: ԵԽԽՎ պատվիրակներն ասում են, որ սա աննախադեպ իրավիճակ է ԵԽԽՎ պատմության ընթացքում:
Հերթով Բյուրոյի նիստից դուրս էին գալիս Բյուրոյի անդամները բավականին շփոթված ու լարված, անգամ չէին ցանկանում զրուցել լրատվամիջոցների ներկայացուցիչների հետ: Կցկտուր տեղեկություններ էին տալիս, որ Բյուրոն ուղիներ է փնտրում Ագրամունտի լիազորությունները սահմանափակելու և նրա իմպիչմենտի գործընթացը կազմակերպելու համար:
Կարդացեք նաև
Մինչ Բյուրոյի նիստի անցկացման սրահի մուտքի մոտ լարված իրավիճակ էր, լրագրողները սպասում էին, Բյուրոյի անդամները խուսափում էին հարցազրույց տալուց, հայտնվեց Ագրամունտի` մամուլի գծով օգնականը և հայտարարեց, որ կես ժամից հայտարարությամբ հանդես կգան:
Բյուրոյի անդամներից ոչ ոք չգիտեր, թե որտեղ է այժմ գտնվում Ագրամունտը:
Քանի որ Ագրամունտը բացակայում էր, Բյուրոյի նիստը նախագահեց բրիտանացի պատվիրակ Ռոջեր Գեյլը: Նիստից հետո նա Բյուրոյի անունից հանդես եկավ հայտարարությամբ: Լրագրողների հետ զրույցում նշեց. «ԵԽԽՎ նախագահն այսօր ներկա չգտնվեց Բյուրոյի նիստին, որպեսզի իր հայտարարությունն անի: Ուստի ես նախագահեցի նիստը: Բյուրոն երկու հայտարարություն ընդունեց: Առաջինն այն է, որ Բյուրոն չունի վստահություն ԵԽԽՎ նախագահի նկատմամբ, և երկրորդը` որպես առաջինի հետևանք, այն, որ Ագրամունտն այլևս իրավունք չի ունենա ճամփորդել կամ հայտարարություններ անել ԵԽԽՎ-ի անունից»:
Ուկրաինացի պատվիրակ, Բյուրոյի անդամ Գեորգի Լոգվինսկին հայտնեց, որ Ագրամունտի հրաժարականը կարող է լինել ցանկացած պահի կամ հունիսին կայանալիք ԵԽԽՎ նստաշրջանի ընթացքում, կամ Բյուրոյի հաջորդ` մայիսի 13-ին կայանալիք նիստին, կամ գուցե այս հարցով Բյուրոն լրացուցիչ նիստ գումարի. «Եթե Ագրամունտն ի վերջո պնդի ու չցանկանա հրաժարական ներկայացնել, ապա դա ԵԽԽՎ-ի կողմից կընդունվի ի գիտություն և վեհաժողովը կոնկրետ քայլեր կձեռնարկի»:
Տաթև ՀԱՐՈՒԹՅՈՒՆՅԱՆ
