«Ուրբաթ օրվա բյուրոյի նիստին ես ներկա եմ եղել: Տիկին Զոհրաբյանի անունն այնտեղ չի հնչել»,- Aravot.am-ի հարցին այսպես պատասխանեց ԵԽԽՎ հայաստանյան պատվիրակության ղեկավար, ԵԽԽՎ փոխնախագահ Հերմինե Նաղդալյանը:
Մամուլում հրապարակումներ եղան, որ ուրբաթ օրը տեղի է ունեցել ԵԽԽՎ բյուրոյի նիստը, որի ժամանակ ԵԽԽՎ-ում Թուրքիայի պատվիրակության ղեկավարը բյուրոյին բանավոր բողոք է ներկայացրել, որ հայկական պատվիրակության անդամ Նաիրա Զոհրաբյանը անձնական բնույթի վիրավորանքներ է հասցրել Թուրքիայի ազգությամբ հայ պատգամավոր Մարգար Եսայանին:
Թուրքիայի պատվիրակության ղեկավարի բողոքին միացել է նաեւ Լիբերալ դեմոկրատների խմբի ղեկավար Ջորդի Խուգլա Կոստան, որի խմբի անդամ է Մարգար Եսայանն ու ասել է, որ Մարգար Եսայանը իրեն եւս, որպես խմբի ղեկավարի, բողոք է ներկայացրել, որ հայ կին պատգամավորն իրեն անձնական վիրավորանքներ է հասցրել, եւ Բյուրոն քննարկել է, թե ինչ քայլեր ձեռնարկել ընդդեմ Զոհրաբյանի: ԵԽԽՎ նախագահ Պեդրո Ագրամունտն ասել է, որ իրենք առաջիկայում այդ խնդրին կանդրադառնան եւ կորոշեն, թե ինչ անել:
Թուրքիայի պատվիրակության հայազգի անդամ Մարգար Եսայանը, հիշեցնենք, «կողմ» էր քվեարկել հակահայկական երկու զեկույցներին:
Կարդացեք նաև
Նելլի ԳՐԻԳՈՐՅԱՆ
