Երեւանի Խորենացի փողոցում անցած տարվա հուլիսի 19-ին ոստիկանության մեքենայի ապակին կոտրելու հրահանգներ տալու մեջ մեղադրվող «Նոր քաղաքական մշակույթ» կուսակցության նախագահ Անի Զախարյանի համար մեղադրողն այսօր պահանջեց պայմանական ազատազրկում:
«Միջնորդում եմ դատապարտել երեք տարվա ազատազրկման, սակայն, կիրառելով 70-րդ հոդվածը, պատիժը պայմանականորեն չկիրառել եւ սահմանել փորձաշրջան չորս տարվա ժամկետով»,- այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում պահանջեց դատախազը՝ պնդելով, որ Զախարյանի մեղավորությունն ապացուցվել է:
Պաշտպանական կողմը ժամանակ խնդրեց պաշտպանական ճառին պատրաստվելու համար: Հաջորդ դատական նիստը նշանակվեց հունիսի 28-ին:
Հիշեցնենք, որ Անի Զախարյանը մեղադրվում է հուլիսի 19-ին ժամը 20-ի սահմաններում Երեւանի Խորենացի եւ Քրիստափոր խաչմերուկում ինքնաբուխ հանրահավաքի ընթացքում բարձրախոսով կոչեր հնչեցնելու եւ մի խումբ ինքնությունները չպարզված անձանց դրդելու կոտրել եւ վնասել այդ պահին հիշյալ խաչմերուկում իր ծառայողական պարտքը կատարող ոստիկանության մեքենան, որի մեջ եղել են ոստիկանության ծառայողներ: Անի Զախարյանին մեղադրանք է առաջադրվել Քրեական օրենսգրքի 38-185-րդ հոդվածի 2-րդ մասի 3-րդ կետով, այն է` ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Խափանման միջոց է ընտրվել ստորագրություն չհեռանալու մասին:
Արփինե ՍԻՄՈՆՅԱՆ
