Այսօր ԱԺ-ում 2016-ի բյուջեի կատարման հաշվետվության քննարկման ժամանակ «Ծառուկյան» դաշինքի պատգամավոր Արարատ Զուրաբյանը արտգործնախարար Էդվարդ Նալբանդյանին հարցրեց, թե ինչպե՞ս կարող ենք Ղարաբաղը վերադարձնել բանակցությունների սեղան. «Ի՞նչ է անհրաժեշտ անել: Դուք, որպես արտգործնախարար, երկու գործառույթ ունեք, կցանկանայի, որպեսզի դուք ամեն լումայի համար այստեղ կռվեիք, ամեն ինչ անեիք, որ ֆինանսավորումը մեծանար: Կոչ կանեի երբեւիցե չընդունել այն խաղի կանոնը, որ կառավարությունը կարող է թելադրել, երբ ասում են՝ միջոցներ չկան: Միջոցները պետք է հայթայթել»:
Զուրաբյանը նաեւ 57 դիվանագիտական ներկայացուցչությունների մասին հարց ուղղեց, այն երկրների մասին, որտեղ Հայաստանը չունի ներկայացուցչություն:
Նախարարը պատասխանեց, որ միջոցների համարն ինքը երբեւէ չի ասել պակասեցրեք, հակառակը՝ հիմնավորել է, որ դրա անհրաժեշտությունը կա: Բայց, ըստ նախարարի, հնարավորությունների հետ է կապված:
Հնարավորության հարց է նաեւ դեսպանություններ ունենալը բոլոր երկրներում. «Էս են մեր հնարավորությունները, այսպես ենք գործում, շատ հնարավորություն ունենաք՝ կավելացնենք մեր դիվանագետների թիվը արտերկրում: Չեմ կարծում, որ հիմա պետք է դժգոհենք, ասենք հնարավորություն չկա եւ դա արդարացում լինի այն բացթողումների, որ չենք արել»:
Ղարաբաղը բանակցությունների սեղան վերադարձնելու հետ կապված Էդվարդ Նալբանդյանն ասաց. «Բոլոր բանակցային աշխատանքային փաստաթղթերում, որոնք ի պահ են դրված ԵԱՀԿ-ի գլխավոր գրասենյակում Վիեննայում, ես ամբողջ պատասխանատվությամբ եմ հայտարարում, որովհետեւ այսօր դա չի հրապարակվում, բանակցային գործընթաց է գնում, դա փակ գործընթաց է, բայց մի օր դա կհրապարակվի: Բոլոր փաստաթղթերում, ինչ առաջարկվել է եռանախագահների կողմից եւ ինչ բանակցվել է, տեղ է գտել այդ փաստաթղթերում, բոլորի մեջ ասված է՝ Լեռնային Ղարաբաղի ներկայացուցիչները պետք է մասնակցեն բուն խաղաղության պայմանագրի մշակմանը բանակցություններին: Սա հստակ ֆիքսված է եւ առանց դրա որեւէ պայմանագիր չի գործում: Անհնար է առանց Ղարաբաղի որեւէ համաձայնության գալ եւ հաշվել, որ այդ համաձայնությունը արդեն ձեւակերպված է»:
Հռիփսիմե ՋԵԲԵՋՅԱՆ
