Աղցան «Միջերկրածովյան խառնուրդ»

Լոլիկ-վարունգով աղցանը հատուկ է գրեթե բոլոր խոհանոցներին` սկսած հայկականից, վերջացրած մեքսիկականով, եւ, իհարկե` միջերկրածովյան երկրների խոհանոցով:

Այս աղցանը թերեւս կարելի էր հունական կոչել, եթե նրա մեջ ֆետա պանիրի փոխարեն իտալական մոցարելա չլիներ, ինչպես նաեւ` արաբական փիթա հացի տապակած կտորներ, որոնք ֆաթուշին են սազական:

Մի խոսքով` իրար ենք խառնում տարբեր խոհանոցներ ու ստանում շատ համեղ «միքս» աղցան:

Անհրաժեշտ մթերքները

Հազարաթերթիկի տերեւներ- 5-6 տերեւ

Լոլիկ- 3-4 հատ

Վարունգ-1-2 հատ

Թարմ պղպեղ (ցանկացած գույնի` կանաչ-կարմիր-դեղին-գազարագույն)- 1 հատ

Գլուխ սոխ- 1 գլուխ

Թարմ ռեհան- 1-2 ճյուղ

Ձիթապտուղ- 10-15 հատիկ

Ձիթապտղի յուղ- 3-4 ճաշի գդալ

Մոցարելայի գնդիկներ- 10-15 հատիկ

Արաբական փիթա հաց- 1 լոշիկ կամ 0,5 հատ լավաշ

Նռան օշարակ-1ճաշի գդալ

Բալզամիկ քացախ- 1 ճաշի գդալ

Պատրաստման եղանակը

Բոլոր բանջարեղենները մաքրել, լվանալ: Հազարաթերթիկը ձեռքով մի քանի մասի մասնատել (դանակի հետ շփումը այս բանջարեղենին այնքան էլ դուր չի գալիս):

Լոլիկն ու վարունգը կտրատել կիսալուսնաձեւ, մաքրած, լվացած սոխն ու թարմ պղպեղը` բարակ շերտերով: Լվացած եւ չորացրած ռեհանի տերեւները նույնպես ավելացրեք բանջարեղենին:

Բանջարեղենները հերթով լցրեք աղցանամանի մեջ, ավելացրեք ձիթապտուղն ու ձիթապտղի յուղը, լավ խառնեք: Մոցարելայի գնդիկները ավելացրեք խառնելուց հետո` որպեսզի գնդիկները պահպանեն իրենց տեսքը: Լոշիկը կտրատեք մկրատով` մանր եռանկյունիների եւ շատ քիչ ձեթով թեթեւակի տապակեք: Տապակած լոշիկը ավելացրեք անմիջապես մատուցելուց առաջ, որպեսզի չլխկի: Նռան օշարակն ու բալզամիկ քացախը խառնեք իրար սուրճի բաժակի մեջ եւ աղցանը մատուցելուց առաջ դրանով ցողեք աղցանը: Հունա-իտալա-արաբական աղցանը պատրաստ է:

Բարի ախորժակ:

Պատրաստեց Մելանյա ԲԱՐՍԵՂՅԱՆԸ

«Առավոտ»

19.07.2017