«Արցախի հիմնահարցը ունի միայն մեկ լուծում. դա բանակցային տարբերակով է: Չեմ կարծում, որ որևէ մեկը պետք է կասկածի դրանում: Միակ ճանապարհը դա բանակցությունների եղանակով հարցի լուծման ճանապարհն է և դա հստակ է»,- Արցախի Հանրապետության նախագահի հետ հանդիպումից հետո լրագրողների հետ զրույցում ասաց Հայաստանի Հանրապետության նախագահի պաշտոնի համար ՀՀԿ կողմից առաջադրված թեկնածու Արմեն Սարգսյանը:
‹‹Ինձ համար շատ կարևոր հանդիպում է այսօր: Ես երկար ու հետաքրքիր զրույց ունեցա Արցախի Հանրապետության նախագահի հետ: Եվ քաղաքականության և ԵԱՀԿ Մինսկի խմբի աշխատանքի վերաբերյալ: Մանավանդ որ համանախագահները այսօր Ստեփանակերտում են և ինձ համար շատ հետաքրքիր էր անձամբ նախագահից և նրա գործընկերներից լսել բանակցությունների մասին, խնդիրների մասին, ծանոթանալ Արցախի կյանքին տնտեսությանը, գրանցած հաջողություններին»,- նշեց Արմեն Սարգսյանը` մաղթելով, որ Արցախի Հանրապետությունը շարունակի հաջողություններ գրանցել` Հայաստանի ու Սփյուռքի հետ միասին:
Արմեն Սարգսյանը նշեց, որ Արցախ այցելել է և մինչ վարչապետ լինելու տարիները, և խորհրդային տարիներին, ուղղակի, ինչպես նշում է նա, այդ ժամանակ իր նկատմամբ հետարքրքություն երևի չկար:
Անդրադառնալով Արցախի օրակարգային խնդիրներին` նա առանձնացրեց կրթության ոլորտը. «Եվ դա ոչ միայն Արցախում, այլ նաև Հայաստանում: Ավելի խորությամբ ծանոթանալու համար կայցելեմ նաև Արցախի կրթական հաստատություններ»:
Դավիթ ԱԲԱՂՅԱՆ
