«Ես հաջողություն եմ մաղթում Նիկոլ Փաշինյանին, եթե կկարողանա անել՝ փառք ու պատիվ իրեն». Լյուդմիլա Սարգսյան

Այսօր «Բլից ինֆո» ակումբում ՎՍԴՀԿ ատենապետ Լյուդմիլա Սարգսյանն ասաց, որ մարդիկ, որոնք 10 հազար դրամով ընտրել են ՀՀԿ-ին, հիմա չեն կարող դուրս գալ փողոց ու պայքարել, որ Սերժ Սարգսյանը վարչապետ չդառնա: Բացի այդ, նա ասաց, որ միայն Սերժ Սարգսյանի վարչապետ չլինելու համար մարդիկ ոտքի չեն կանգնի, միեւնույն է, ՀՀԿ-ական է լինելու վարչապետը:

Մեր հարցին՝ այսինքն, հիմա, Նիկոլ Փաշինյանը հայտարարում է, որ իր ընտանիքն իրեն պատրաստ է գործուղել Ազատության հրապարակ, ըստ երեւույթին փողոցային պայքարի են ելնում, դա դատապարտված է ձախողմա՞ն՝ Լյուդմիլա Սարգսյանը պատասխանեց. «Դա իմ կարծիքն է, բայց չէի ասի դատապարտված է: Միգուցե Նիկոլ Փաշինյանը, որն ունի քաղաքական դաշտում պայքարի մեծ փորձ, կկարողանա ինչ-որ քաղաքական ուժերի համախմբել, գտնել ճիշտ խոսքեր՝ մարդկանց փողոց դուրս բերելու համար: Բայց դա պետք է շատ մեծ քանակություն լինի, որ կարողանա ազդել ՀՀԿ-ի որոշման վրա: Ամեն դեպքում, ես ողջունում եմ, որ ինչ-որ բան արվում է, կուզեի, որ մտածված արվեր, հանրությունը հերթական անգամ հիասթափություն չկրեր»:

Փաշինյանը չէր բացառել, որ վարչապետի թեկնածուն կարող էր հենց ինքը լինել, հարցին՝ իր համար մարդիկ դուրս կգա՞ն փողոց՝ Լյուդմիլա Սարգսյանը պատասխանեց. «Չեմ կարծում: Նախ, այլընտրանք ներկայացնել այս իրավիճակում անիմաստ է, որովհետեւ քաղաքական մեծամասնությունն իրավունք ունի ներկայացնել վարչապետի թեկնածու, արդեն իսկ Սահմանադրորեն հակասություն կա այդտեղ, եթե Նիկոլ Փաշինյանն առաջադրվի: Հետո ակնհայտ է, չէ՞, թե քվեարկության արդյունքում ով է շահելու, այդ դեպքում ի՞նչ իմաստ ունի ներկայացնելը: Ես հաջողություն եմ մաղթում Նիկոլ Փաշինյանին, եթե կկարողանա անել՝ փառք ու պատիվ իրեն: Ինքս մի փոքր կասկածներ ունեմ»:

Լյուդմիլա Սարգսյանը չի բացառում, որ Սերժ Սարգսյանը ՀՀԿ-ականներից մեկ ուրիշին առաջադրի, թեեւ հիմա աժիոտաժ է ստեղծվել իր անձի շուրջ:

Հռիփսիմե ՋԵԲԵՋՅԱՆ