Քարուքանդ փողոցների ու բազմատեսակ տնակների քաղաք Գյումրին վերջերս վերածվել է ընտանի կենդանիների բնակավայրի։ Շանն ու կատվին, թերեւս, կարելի է դասել քաղաքի նախկին փողոցային բնակիչների թվին, սակայն խոզերը նորություն են։
Նորակառույց «Անի» թաղամասի ճանապարհին, չգիտես ինչ արտոնություններից ելնելով, խոզեր են բազմացնում։ Ընդ որում, նույն փողոցի ամբողջ տարածքում նկատվում են նաեւ կովերի ոտնահետքեր։ Պատճառը հասկանալի է՝ անասունները շատերի ապրուստի միակ միջոցն են։ Բայց հետեւանքնե՞րը… Անտանելի փոշուն ավելանում է խոզերի ու կովերի գարշահոտը, որն էլ նպաստում է ճանճերի բազմացմանը։ Ճանճերը, բոլորիս է հայտնի, հիվանդություններ տարածողներ են։
Չնայած այս ամենին, ինձ հուզողն այլ հարց է. բնակիչների ներկայությունը չի՞ խանգարում անասունների հանգստին ու բազմացմանը…
Նունե ԱՐԵՎՇԱՏՅԱՆ
