ԱԺ էներգետիկ հարցերի ժամանակավոր հանձնաժողովն անորոշ ժամանակով զինվել է։ Հանձնաժողովի անդամների բաճկոնների տակից ցցուն երեւում են նրանց նորաթուխ ատրճանակները։ Եթե, ըստ Ստանիսլավսկու, բեմի վրա երեւացող հրացանը ինչ-որ պահի պարտադիր պիտի կրակի, ապա ո՞վ է ասել, թե բաճկոնի տակից երեւացողները անգործությունից պիտի ժանգոտեն։
ԱՆՆԱԽԱԴԵՊ ՕՐԻՆԱԿ
«Եզդիների ազգային միության» գործունեությունը դադարեցնելու պահանջով ՀՀ արդարադատության նախարար Դավիթ Հարությունյանը դիմել էր Քանաքեռ-Զեյթուն համայնքների առաջին ատյանի դատարան, ինչին «Առավոտն» անդրադարձել էր։ Սա, փաստորեն, 2000-ից ավելի հասարակական կազմակերպությունների, մասնավորապես ազգային փոքրամասնությունների միությունների համար նախադեպ էր։ Երեկ, սակայն, տեղեկացանք, որ արդարադատության նախարարն իր հայցը հետ է վերցրել՝ ցույց տալով արդարադատության հաղթանակի աննախադեպ օրինակ։
Կարդացեք նաև
ԳԵՆԴԵՐԱՅԻՆ
Պաշտպանության նախարարությունը ապրիլի 7-ի կապակցությամբ իր աշխատակցուհիներին է նվիրել սեւ զուգագուլպաներ եւ մի քանի շրթներկ։
ՊՆ տիկնայք պնդում են, որ Վազգեն Սարգսյանի օրոք Մայրության եւ գեղեցկության տոնը շատ ուրախ էր անցնում ու նույնը սպասում են այսօր։
ՏՈՆԱԿԱՆ
Ապրիլի 7-ը տոնացույցում ընդգրկելու ջերմ պաշտպան եւ նախաձեռնող տիկին Հրանուշ Հակոբյանը, շնորհավորելով մի խումբ լրագրողուհիների, ասաց. «Մի լսեք էս նախանձ տղամարդկանց։ Նրանք պարզապես չեն ուզում հանդուրժել, որ մենք երկու տոն ունենանք։ Մարտի 8-ը Կանանց միջազգային օրն է, իսկ ապրիլի 7-ը՝ Մայրության եւ գեղեցկության մեր ազգային տոնը»։
