ՉՀԱՄԵՄԱՏԵ՛Ք Քաղաքական այն ուժերը, որոնք կարծում են, թե «Հոկտեմբերի 27»-ը չկանխելու համար Ռոբերտ Քոչարյանը պատասխանատու չէ, փաստարկ են դարձրել, թե որեւէ մեկի մտքով չանցավ պահանջել Պուտինի հրաժարականը՝ «Կուրսկ» սուզանավի խորտակումից հետո կամ Բուշի նկատմամբ իմփիչմենթի գործընթաց սկսել՝ «Սեպտեմբերի 11-ից» հետո։ Իհարկե, գյուտ է «27»-ը սուզանավի հետ համեմատելը, բայց անգամ «Կուրսկի» խորտակումից հետո իրենց պաշտոններից ազատվեցին Հյուսիսային նավատորմի հրամանատարից մինչեւ դիվիզիայի հրամանատարներ։ Պաշտպանության նախարարը եւ նավատորմի գլխավոր հրամանատարը հրաժարական ներկայացրին։ Իսկ ԱՄՆ-ում, հայտնի է, դեռ շարունակվում է Կոնգրեսի նախաձեռնած (3 մլն դոլար բյուջեով) հետաքննությունը, թե ինչու Հատուկ ծառայությունները չկանխեցին «Սեպտեմբերի 11-ը»։ ՀԴԿ նախագահ Արամ Սարգսյանը թեեւ նշեց, որ անլուրջ է «27»-ը «Կուրսկի» հետ համեմատելը. «Բայց համենայն դեպս, անգամ այդ սուզանավի խորտակումից հետո ՌԴ-ում վերանայվեց անվտանգության ողջ համակարգը, որ պարզվի, թե ինչի հետեւանք էր կատարվածը, եւ մեղավորները պատժվեցին։ Պիտի հիշեցնեմ նաեւ, որ Բուշին այսօր մեղադրում են, թե տեղյակ է եղել նախապատրաստվող ահաբեկչությանը, ու նա պետք է այժմ նույնպես վերանայի անվտանգության իր համակարգը։ Հայաստանում չի՛ եղել նման որեւէ փաստ»։ Պաշտպանության նախկին նախարար Վաղարշակ Հարությունյանն էլ հավելեց. «Պետք է հաշվի առնել, թե այս դեպքերից յուրաքանչյուրում որքանով է վտանգվել երկրի անվտանգությունը։ «Կուրսկի» պարագայում ՌԴ պետության անվտանգությունը չի տուժել, թեեւ զոհեր են եղել։ Բայց անգամ այս պարագայում պատասխանատվության ենթարկվեցին բազմաթիվ պաշտոնատարներ։ ԱՄՆ-ում էլ, ճիշտ է, սեպտեմբերի 11-ին շուրջ 4 հազար մարդ զոհվեց, բայց չվտանգվեց պետության ղեկավարման համակարգը։ Բուշը համընդհանուր մոբիլիզացիա հայտարարեց եւ ռազմական դրություն։ Եվ մինչ այժմ պարզում են պատասխանատուներին։ Իսկ «Հոկտեմբերի 27»-ն այլ դեպք է. սրանք եղել են Հատուկ ծառայությունների տեսադաշտում, ամենուր հայտնել են իրենց հետագա քայլերի մասին»։ ՀԴԿ նախագահ Արամ Սարգսյանը մատնանշեց հիմնական տարբերությունը Հայաստանում եւ ԱՄՆ-ում կամ ՌԴ-ում կատարվածների միջեւ՝ նախագահների պահվածքը. «Նրանք երկուսը գործողություններ ձեռնարկեցին կարգավորելու երկրի վիճակը, իսկ Հայաստանի նախագահի «շնորհիվ» վիճակն ավելի ծանրացավ»։ Ա. Ի.
