ԸՆԴԴԵՄ ՆԵՐՔԻՆ ԺԱՆԳԻ ԵԿՄ վարչությունը յուրօրինակ ծրագիր է իրականացնում Վազգեն Սարգսյանի 50-ամյակին ընդառաջ՝ 2009թ. մարտի 5-ին նա կդառնար 50 տարեկան: Ծրագիրը նպատակ ունի արժեւորել նրա վաստակը, բազմակողմանիորեն ներկայացնել Վազգեն Սարգսյան գործչին ու մտավորականին: Այդ նպատակով 1000-ական օրինակով կտպագրվեն 50 տեսակի պլակատներ՝ Սպարապետի լուսանկարներով, որոնց ներքո կզետեղվեն պատառիկներ նրա մտքերից: Հերոսի որոշ մտահոգություններ հրատապ են նաեւ այսօր: «Մեր ներքին ժանգը մեզ ներսից ուտում ու պառակտում է, պառակտում է մեր ժողովրդին: Ժողովուրդը կորցնում է հավատն իր ներուժի նկատմամբ, եւ սա ամենասարսափելին է: Մեր արած լավ գործերն անգամ մենք չենք կարողանում նկատել: Բացասման բացասումը մեր տունը քանդում է»,- գրված է պլակատներից մեկի վրա: «Ժողովու՛րդ, պատերազմը դեռ չի ավարտվել, զգոն եղեք, որ չպարտվեք»,- հաջորդ պլակատի վրա էլ Վազգեն Սարգսյանի այս միտքն է: ԵԿՄ վարչությունը նախատեսել է տարեկան հրատարակել նաեւ 4 տեսակի սեղանի օրացույց՝ դարձյալ 1000-ական տպաքանակով, որոնցում եւս կլինեն նկարներ ու դրվագներ Վազգեն Սարգսյանի կյանքից: Գունավոր հանդես էլ կհրատարակվի՝ «Մտածե՛ք այս երկրի մասին» խորագրով: 4 համարի նյութերն արդեն պատրաստ են: Ծրագիրն իրագործելու համար փնտրվում են հովանավորներ, սակայն, ինչպես նշեց ԵԿՄ վարչության անդամ Հ. Հակոբյանը. «Եթե իրենց օգնությունը մեզ առաջարկեն անհատներ կամ կազմակերպություններ, պիտի անպայման ճշտենք՝ որքանով են նրանց փողերը մաքուր: Իսկ այն, ինչ արված է մինչեւ հիմա, արված է ԵԿՄ վարչության, Վազգեն Սարգսյանի ընտանիքի եւ նրա արդեն սակավաթիվ մտերիմների միջոցներով»: ԳՈՀԱՐ ՀԱԿՈԲՅԱՆ