ՓԱԿԵՑԻՆ, ՀԻՄԱ ԷԼ ՇԵՆՔԻՑ ՎՏԱՐՈՒՄ ԵՆ Երեկ Ակադեմիայի գրականության ինստիտուտի տնօրինությունը կրկին սպառնացել է շենքից վտարել Գրիգոր Լուսավորչի 15 հասցեում տեղակայված «Ա1+» հեռուստաընկերությանը, եթե վերջինս ինքնակամ չլքի տարածքը: Շենքում գործում են a1plus ինտերնետային կայքը, «Այբ-Ֆե» շաբաթաթերթը, կազմակերպվում են հեռուստատեսության դասընթացներ: Չնայած, որ շենքի տերերը տարածքն ազատելու համար «Ա1+» հեռուստաընկերության տնօրեն Մեսրոպ Մովսեսյանին մեկ շաբաթ ժամանակ են տվել, սակայն արդեն քանի օր է՝ տարածքում ցուցադրական վերանորոգման աշխատանքներ են սկսել՝ խոչընդոտելով ընկերության աշխատանքը: Հակառակ սպառնալիքներին, Մ. Մովսեսյանը չի պատրաստվում տարածքն ազատել. «Ես դուրս չեմ գալու, քառասուն հոգու չեմ հանելու գցեմ փողոց: 14 տարիների գործունեության ընթացքում մենք այս շենքում մեծ ներդրումներ ենք արել՝ ընդլայնել ենք տարածքը, շենքում վերանորոգման աշխատանքներ ենք կատարել: Մինչ այսօր պահակներին, հավաքարարին վարձատրում է «Ա1+»-ը, այսօր մեզ փողո՞ց են գցում: Քանի որ կառավարությունը ակադեմիային շենքը տալու որոշում է կայացրել՝ մեզ աչքաթող անելով, թող ակադեմիան փոխհատուցի մեր ներդրումները, որպեսզի մենք այդ գումարներով այլ տեղ տարածք վարձակալենք, վերանորոգենք եւ տեղափոխման բոլոր խնդիրները լուծենք: Միայն սարքավորումները եւ լարային ցանցը շենքից ապամոնտաժելու դեպքում հսկայական վնասներ ենք կրելու: Կառավարության ուզածն ի՞նչ է, որ մենք փակվենք կամ լքե՞նք էս երկիրը»: Ի դեպ, նշյալ հասցեում, բացի «Ա1+»-ից, վարձակալներ են նաեւ մի քանի այլ ընկերություններ ու հիմնարկներ, որոնց, Մեսրոպ Մովսեսյանի խոսքերով, ամենեւին էլ չեն փորձում վտարել. «Եթե այդ բոլոր հիմնարկները դուրս գան, ես էլ դուրս կգամ»,- ասում է «Ա1+»-ի տնօրենը: Երեկ Մ. Մովսեսյանը պատրաստվում էր նամակով կրկին դիմել վարչապետին՝ ակնկալելով հարցի լուծում: ԼՈՒՍԻՆԵ ԲՈՒԴԱՂՅԱՆ
