Փաստաբանական ինստիտուտը չի գործում Հարցազրույց ՀՀ փաստաբանների պալատի ընտրված նախագահ, իրավագիտության դոկտոր Ենոք Ազարյանի հետ: – Պարոն Ազարյան, ի՞նչ վիճակում է փաստաբանների պալատի շուրջ ստեղծված դատական վեճը։ – ՀՀ վճռաբեկ դատարանի քաղաքացիական եւ տնտեսական գործերով պալատը դեռ չի քննել մեր կողմից ներկայացված Վճռաբեկ բողոքը: Ինչ վերաբերում է ՀՀ փաստաբանների պալատի հանձնաժողովներում ընտրված անդամների ընտրությունը չկայացած ճանաչելու հայցադիմումին, որը Կենտրոն եւ Նորք-Մարաշ համայնքների առաջին ատյանի դատարանում Է, նիստի օրը դեռ չի վերանշանակվել: – Փաստորեն, ՀՀ փաստաբանների պալատը չի կազմավորվում եւ փաստաբանական ինստիտուտը չի՞ գործում ՀՀ-ում։ – Փաստաբանական ինստիտուտը գործում Է եւ, իմիջիայլոց՝ բավականին արդյունավետ: «Փաստաբանության մասին» ՀՀ օրենքի անցումային եւ եզրափակիչ դրույթներում ամրագրված Է, որ ՀՀ֊ում գործող փաստաբանական մյուս միությունների լիազորությունները պահպանվում են մինչեւ փաստաբանների պալատի կազմավորումը: ՀՀ փաստաբանների միությունն իմ ժամանակավոր միության նախագահի պաշտոնակատար եղած ընթացքում, ՀՀ փաստաբանության մասին ՀՀ օրենքի համաձայն, ստեղծել Է փաստաբանների միություն դիմած փաստաբանների արտոնագրի հավակնորդների փաստաթղթերը ուսումնասիրող ժամանակավոր հանձնաժողով, հաստատել ենք հանձնաժողովի համապատասխան աշխատակարգը եւ հանձնաժողովի եզրակացության հիման վրա միության խորհուրդը, փաստաբանության մասին ՀՀ օրենքի 48 եւ 28 հհ-ի համաձայն, 34 հավակնորդների տրամադրել Է փաստաբանական գործունեությամբ զբաղվելու արտոնագիր: Գյումրի եւ Վանաձոր քաղաքների փաստաբանական գրասենյակներին, ինչպես նաեւ ՀՀ փաստաբանների միության հաշվապահությանը հատկացվել են համակարգիչներ «Իրտեկ» ծրագրով: Բարձրացվել Է միության աշխատակազմի աշխատավարձը։ Ֆիզիոլոգիական արձակուրդում գտնվող կին-փաստաբաններն ազատվել են անդամավճարների մուծումից, նշվել Է Փաստաբանության կազմավորման 83-ամյակը: Անխափան իրականացվել է պետպաշտպանություն։ Իհարկե, եթե պալատը ձեւավորված լիներ, մենք բավականին լուրջ առաջընթաց արձանագրած կլինեինք, սակայն, ցավոք, եղավ այն, ինչ որ եղավ։ Կարծում եմ, բաց թողնվածը վերականգնելու համար երկար ժամանակ կպահանջվի։ – Դուք չե՞ք կարծում, որ Վճռաբեկ դատարանը նույն կերպ կվարվի, ինչպես առաջին ատյանը եւ վերաքննիչ դատարանը: Կմերժի ձեր բողոքը։ – Իհարկե, չեմ բացառում նման ելք։ Այդուհանդերձ, կաշկանդված չեմ դատական համակարգի կայացրած որոշումներով: Մենք ունենք մեր դիրքորոշումը վեճի շուրջ եւ մնում ենք նույն այն համոզմունքին, որ դատական համակարգը դեռ բավականին երկար ճանապարհ ունի անցնելու արդարադատություն իրականացնելու համար։ – ՀՀ փաստաբանները, իրողությունն այն է, որ բաժանվել են երկու թեւի։ – Անկախ բոլոր հանգամանքներից, փաստաբաններիս միավորում է մեկ ընդհանուր նպատակ։ Մարդու եւ քաղաքացու իրավունքների եւ ազատությունների ամենօրյա պաշտպանությունը, որի շուրջ, ուշ թե շուտ՝ նորից միավորվելու ենք։ Հարցազրույցը՝ ՌՈՒԶԱՆ ՄԻՆԱՍՅԱՆԻ