ՖՈՒՏԲՈԼ ԵՎ ԲԱՐԵԳՈՐԾՈՒԹՅՈՒՆ Օրերս «Մալաթիա» ֆուտբոլի խաղադաշտում Հայաստանի արտասահմանյան լրագրողների ասոցիացիայի (ԱԼԱ) նախաձեռնությամբ ֆուտբոլի բարեգործական հանդիպում անցկացվեց Հայաստանում արտասահմանյան դեսպանությունների (Իտալիա, ԱՄՆ, Գերմանիա, Հայաստանի ԱԳՆ) եւ հանրապետության լրագրողների հավաքականների մասնակցությամբ: Խաղն ընթացավ բավականին լարված ու հետաքրքիր: Առաջին խաղակեսում 3:0 հաշվով առջեւում էին լրագրողները, սակայն հանգստից հետո դիվանագետները կարողացան ետ բերել կորցրածը: Ի վերջո, գրանցվեց 5:5 հաշիվ: Միջոցառման կազմակերպմանն աջակցել էին Հայաստանի ֆուտբոլի ֆեդերացիան, Երեւանի «Բանանց» ֆուտբոլային ակումբը եւ «Երեւանի գարեջուր» ՓԲԸ-ն: Հանդիպումից գոյացած գումարով մասնակիցները Երեւանի «Զատիկ» մանկատան համար գնեցին շաքարավազ, բրինձ, միրգ, ինչպես նաեւ մանկատան ֆուտբոլային թիմի համար՝ մարզաշապիկներ ու գնդակ: Ասես, ճակատագրի հեգնանքով, լրագրողների հավաքականը, որը միշտ էլ հնարավորությունների ներածի չափով աշխատում է օգտակար լինել օգնության կարիք ունեցողներին, ինքն է հայտնվել դժվարին վիճակում: Օրերս հավաքականը Մինսկից հրավեր է ստացել՝ մասնակցելու հոկտեմբերի սկզբներին Բելառուսի մայրաքաղաքում այդ երկրի նախագահի հովանու ներքո անցկացվելիք ԱՊՀ երկրների լրագրողական թիմերի 7-րդ միջազգային մրցաշարին ու նախապատրաստվում է դրան: Ընդ որում, մեր լրագրողները միշտ էլ մասնակցել են այդ հեղինակավոր մրցաշարերին, որոնք բոլորն էլ, ի դեպ, գտնվել են կազմակերպիչ երկրների նախագահների բարձր հովանու ներքո: Հասկանալի բացառություն է եղել միայն 2000 թվականը, երբ լրագրողները հավաքվել էին Բաքվում: Ավելին, 2001-ին Մոլդովայում Հայաստանի լրագրողները դարձել են բրոնզե մեդալակիր, իսկ 2002-ին՝ նվաճել չեմպիոնի կոչումը: Ցավոք, այս անգամ մեր հեղինակավոր թիմի մասնակցությունը հարցականի տակ է, քանի որ չկան մեկնման միջոցներ: Ներկայումս Հայաստանի լրագրողների ֆուտբոլային հավաքականը հովանավորներ է փնտրում: ՏԻԳՐԱՆ ՀՈՎՀԱՆՆԻՍՅԱՆ Հավաքականի ավագ
