Եվ
այսպես, ֆուտբոլի Հայաստանի ազգային հավաքականը հերթական պարտությունը կրեց աշխարհի
գավաթի խաղարկության որակավորման մրցաշարում՝ 1:4 խոշոր հաշվով զիջելով Չեխիային:
Արդեն 2-րդ տուրն է, ինչ մեր ընտրանին եզրափակում է 1-ին խմբի մրցաշարային
աղյուսակը՝ մեկ միավորով ետ մնալով Անդորրայի հավաքականից: Թե որակավորման մրցաշարը
մեր թիմը ո՞ր տեղով կեզրափակի՝ հայտնի կդառնա հոկտեմբերի 12-ին, երբ Հենկ Վիսմանի
սաները մրցակցի դաշտում ուժերը կչափեն մերձակա մրցակցի հետ: Ազգային հավաքականի
մրցելույթների ընդհանուր գնահատականը, կարծում ենք, դեռ կտրվի հանրապետության ֆուտբոլային
ղեկավարության ու մասնագետների կողմից, սակայն հիմա արդեն կարելի է որոշ վիճակագրական
տվյալներ ներկայացնել, որոնք, ցավոք, ուրախանալու առիթներ չեն տալիս: Մինչեւ այսօր
անցկացրած 11 հանդիպումներում Հայաստանի ազգային հավաքականը կրել է 9 պարտություն,
1 խաղ՝ Ռումինիայի հետ ( Երեւանում՝ 2004 թվականի նոյեմբերի 17-ին) ավարտել ոչ-ոքի
եւ տոնել ընդամենը 1 հաղթանակ ( նույնպես Երեւանում՝ 2005 թվականի մարտի 26-ին Անդորրայի
նկատմամբ): Մեր ընտրանին 2-ական անգամ պարտվել է Մակեդոնիային՝ 0:3 եւ 1:2, Ֆինլանդիային՝
0:2 եւ 1:3, Չեխիային՝ 0:3 եւ 1:4, Հոլանդիային՝ 0:2 եւ 0:1, Ռումինիայի հետ 1-ական
ոչ-ոքի՝ 1:1, ու պարտություն՝ 0:3, ունի եւ միայն Անդորրան է, որին առայժմ հաղթում
ենք՝ 2:1, որը դեռ վերջնական ցուցանիշ չէ, քանի որ հաջորդ հակամարտությունը տեղի
է ունենալու մրցակցի դաշտում: Իսկ նրան նույնպես հաղթանակն օդի պես է անհրաժեշտ:
Բայց ուզում ենք հուսալ, որ որակավորման մրցաշարի ավարտին Հայաստանը, այնուամենայնիվ,
կպահպանի դրական բալանսը՝ գոնե ՖԻՖԱ-ի դասակարգման ցուցակում իրեն 14 աստիճանով զիջող
Անդորրայի նկատմամբ: Պակաս լարված վիճակ չէ նաեւ 1-ին խմբի մրցաշարային աղյուսակի
վերին հատվածում: Միանձնյա առաջատարը Հոլանդիան է, որը 10 խաղում վաստակել է 28 միավոր
(միակը, որ չի ճաշակել պարտության դառնությունը) եւ ամենայն հավանականությամբ իր
համար ապահովել է 2006 թվականի աշխարհի առաջնության եզրափակիչի ուղեգիրը: Այ, երկրորդ
տեղի համար պայքարում են Չեխիան ու Ռումինիան, որում նախապատվությունը չեխերի կողմն
է: 1-ին խմբի մրցաշարային աղյուսակ (սեպտեմբերի 8-ի դրությամբ) Հոլանդիա
10 9 1 0 25-3 28 Չեխիա 10 8 0 2 32-10 24 Ռումինիա 11 7 1 3 19-10
22 Ֆինլանդիա 10 5 1 4 21-15 16 Մակեդոնիա 11 2 2 7 11-24 8 Անդորրա
11 1 2 8 4-31 5 Հայաստան 11 1 1 9 6-25 4 ԱՇՈՏ ՀԱԿՈԲՅԱՆ
