Բուլղարիայի նախկին նախագահ Ժելյու Ժելեւի հրավերով հոկտեմբերի 3-6-ը Բուլղարիայում տեղի ունեցավ Բալկանյան քաղաքական ակումբի կազմակերպած միջազգային կոնֆերանսը, որին մասնակցեց նաեւ ՕԵԿ պատվիրակությունը՝ Արթուր Բաղդասարյանի գլխավորությամբ:
Ֆորումին մասնակցում էին 10-ից ավելի երկրների ներկայացուցիչներ, այդ թվում՝ Թուրքիայի, Ռումինիայի, Մակեդոնիայի, ինչպես նաեւ Բուլղարիայի ներկա եւ նախկին նախագահները: Քննարկվեցին քաղաքական ու տարածաշրջանային զարգացումներին առնչվող հարցեր, այդ թվում՝ կովկասյան երկրներում ժողովրդավարության ամրապնդման, հակամարտությունների կարգավորման, հայ-թուրքական հարաբերությունների զարգացման հեռանկարների եւ Եվրամիության «Նոր հարեւաններ» ծրագրի ապագա տեսլականի մասին: Ժողովրդավարության եւ տարածաշրջանային զարգացումների, ԵՄ-ին մերձեցման հարցերի շուրջ ելույթ ունեցավ Արթուր Բաղդասարյանը:
Ինչպես «Առավոտին» հայտնեց ՕԵԿ փոխնախագահ Հեղինե Բիշարյանը, «Այս համաժողովի արդյունքում ընդունված որոշմամբ թե՛ մենք, թե՛ հարավկովկասյան երկրները ներկայացնող մյուս գործիչները դարձան Բալկանյան քաղաքական ակումբի ասոցացված անդամներ: Հաջորդ քայլը կլինի կովկասյան քաղաքական ակումբի ստեղծումը, որտեղ կներգրավվեն տարածաշրջանի առաջատար քաղաքական գործիչներ ու փորձագետներ»: Տեղի են ունեցել նաեւ անհատական հանդիպումներ Բուլղարիայի եւ Մակեդոնիայի խորհրդարանների ղեկավարության, ինչպես նաեւ մի շարք երկրների՝ Ֆրանսիայի, Անգլիայի, Ռումինիայի, Բուլղարիայի, Հունաստանի, Թուրքիայի, Վրաստանի քաղաքական ու պետական գործիչների հետ:
Արդեն հոկտեմբերի 9-ից ՕԵԿ քաղաքական խորհուրդն ու պատգամավորական խմբակցության անդամները՝ Արթուր Բաղդասարյանի գլխավորությամբ, վերսկսել են հանդիպումները մարզերում: Կուսակցության շուրջ 700 համայնքային կառույցներում քննարկվում են ներքաղաքական իրավիճակին ու հնարավոր քաղաքական զարգացումներին վերաբերող հարցեր: Իսկ հոկտեմբերի 12-ին Ծաղկաձորում կմեկնարկի ՕԵԿ երիտասարդական միության եռօրյա համաժողովը, որին կմասնակցի նաեւ Արթուր Բաղդասարյանը: