Հուլիսի 8-ից արդեն մեր բնակիչները մատակարարվող խմելու ջրի դիմաց պետք է վճարեն թանկ սակագնով՝ 172.8 դրամի փոխարեն՝ 181 դրամ: Այս մասին դեռեւս հունիսի 8-ին որոշում էր կայացրել Հանրային ծառայությունները կարգավորող հանձնաժողովը: «Panorama.am»-ի տեղեկացմամբ, երեկ հրավիրած ասուլիսում «Երեւան ջուր» ընկերության առեւտրային տնօրեն Գագիկ Մարգարյանը ներկայացրել է ջրի թանկացման հետ կապված իր հաշվարկները, ըստ որոնց՝ յուրաքանչյուր ընտանիքի բյուջեի վրա ջրի վարձն ամսական ավելանալու է միջին հաշվով ընդամենը 80-90 դրամով:
Նշենք, որ ջրի տեսուչները հաճախ ինքնագործունեությամբ են զբաղվում եւ առանց ջրաչափի ցուցմունքը նայելու, իրենց գրանցամատյաններում բնակչի սպառած ջրի ծավալի վերաբերյալ հորինված թվեր են գրում: Պարոն Մարգարյանն ասել է, որ երբ մատյանում ցուցումների գրանցման ամսաթիվը տարբերվում է, նշանակում է՝ բնակիչը տանը չի եղել: Նրա խոսքերով՝ ջրաչափական սարքերի տվյալները յուրաքանչյուր ամիս գրանցվում է սահող գրաֆիկի տեսքով՝ ընկերության աշխատակիցների կողմից: