Վրաստանի արտգործնախարարությունը խոստացել է բոլոր ջանքերը գործադրել Մալայզիայում թմրանյութերի առեւտրով զբաղվելու մեղադրանքով անցած շաբաթ կալանավորված իր երկու քաղաքացիների իրավական պաշտպանության համար: Եթե Մալայզիայի դատարանը նրանց մեղավոր ճանաչի, ապա՝ տեղի օրենքների համաձայն, նրանք կարող են մահապատժի ենթարկվել: Վրաց դիվանագետների տեղեկություններով, Վրաստանի քաղաքացի հանդիսացող 26 եւ 37 տարեկան երկու կանանց գործով դատաքննությունը մեկնարկելու է նոյեմբերի 4-ին: Քանի որ Վրաստանը Մալայզիայում ներկայացուցչություն չունի, այդ երկրի հետ բանակցությունները վարվում են Ուկրաինայում Վրաստանի դեսպանության միջոցով՝ փորձելով պաշտոնական տեղեկություններ ստանալ իր քաղաքացիների պահման պայմանների եւ այլ խնդիրների վերաբերյալ: Չնայած երկու երկրների միջեւ էքստրադիցիայի վերաբերյալ համաձայնագիր չի ստորագրվել, բայց Վրաստանի ԱԳ նախարարի տեղակալ Նինո Քալանթաձեն հույս է հայտնել, որ կհաջողվի կանանց տեղափոխել Վրաստան:
