Նոյեմբերի 1-ից՝ մեկ ամիս շարունակ ՀՀ գյուղատնտեսության նախարարության բույսերի կարանտինի եւ երկրագործության պետական տեսչության պետ Վռամ Գյուլզադյանը կվայելի իր արձակուրդային օրերը: Ու դեռ հարց է, արձակուրդից հետո կվերադառնա՞ աշխատանքի, թե՞ ոչ: Բանն այն է, որ պարոն Գյուլզադյանի գլխին սեւ ամպեր են կուտակվել: Դեռ նոյեմբերի 4-ին վարչապետ Տիգրան Սարգսյանը գյուղատնտեսության նախարար Գերասիմ Ալավերդյանին հանձնարարեց «լուծել բուսասանիտարիայի տեսչության պետի խնդիրը»: «Առավոտը» վերոնշյալ տեսչությունից տեղեկացավ, որ Գյուլզադյանը դեռ աշխատանքից չի ազատվել ու մինչ վայելում է արձակուրդը, նրան փոխարինում է պետի տեղակալը՝ Արթուր Նիկոյանը: Ըստ նրա. «Ինչ վերաբերում է տեսչությունում արձանագրված խախտումներին, դրանք դեռ քննարկվում են: Ինչ ինֆորմացիա դուք ունեք, այդ էլ մենք ունենք»: Իսկ թե ով է պետի հավանական թեկնածուն, տեսչության աշխատակիցները ոչինչ չհայտնեցին:
