ՀՀ ԿԳՆ ու մշակույթի նախարարությունները ծխառատ են
«Հայաստանն առանց ծխախոտի» հասարակական դաշինքն ու Հայաստանի ամերիկյան համալսարանի առողջապահական ծառայությունների հետազոտման եւ զարգացման կենտրոնը Երեւանում, Գյումրիում եւ Վանաձորում իրականացրել են հակածխախոտային մոնիտորինգ: Ծխախոտի ծխից զուրկ եւ ամենածխառատ հաստատությունների անուններն արդեն հայտնի են: Երեկ Հայաստանի ամերիկյան համալսարանում կայացած մրցանակաբաշխության ժամանակ հակածխախոտային սիմվոլիկ դրոշներ եւ պատվոգրեր հանձնվեցին մրցանակակիրներին: «Ծխախոտի ծխից ազատ համալսարան» անվանակարգում հաղթողներ են ճանաչվել Ճարտարապետության եւ շինարարության պետական համալսարանը եւ ԵՊՀ-ն: «Ծխաշատ համալսարանի» «մրցանակակիրներն» են Երեւանի թատրոնի եւ կինոյի պետական ինստիտուտը եւ Հայաստանի պետական ճարտարագիտական համալսարանը: Ծխախոտի ծխից զուրկ նախարարություններ են ճանաչվել ՀՀ առողջապահության նախարարությունը, Շիրակի եւ Լոռու մարզպետարանների առողջապահության վարչությունները, Գյումրիի եւ Վանաձորի մի շարք առողջապահական հաստատություններ՝ Գյումրիի հոգեկան առողջության կենտրոնը, «Բեռլին» պոլիկլինիկան, Վանաձորի թիվ 3 պոլիկլինիկան եւ այլն: Ըստ մոնիտորինգի արդյունքների՝ ամենից ծխառատ նախարարություններն են ՀՀ ԿԳՆ-ն եւ ՀՀ մշակույթի նախարարությունը: Ծխից ազատ բուժհաստատություններից լավագույններն են «Մուրացան» համալսարանական հիվանդանոցը, «Սուրբ Գրիգոր Լուսավորիչ», «Մալաթիա», «Քանաքեռ-Զեյթուն» բժշկական կենտրոնները: Երեւանի Հ. Թումանյանի անվան պետական տիկնիկային թատրոնը եւ Կոմիտասի անվան կամերային երաժշտության տունը պատվոգրերի արժանացան՝ համարվելով ծխախոտի ծխից ազատ մշակութային հաստատություններ: «Մարդկությունն իր պատմության մեջ երկու մեծ հիմարություն է թույլ տվել՝ ծխախոտ է հնարել եւ սահմաններ գծել: Դրանցից պետք է ազատվել, եկե՛ք չծխենք, որովհետեւ դրա մեջ ոչ մի լավ բան չկա»,- ասաց Հ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը: Ծխախոտի ծխով առատ մշակութային հաստատությունների շարքը մեծաթիվ էր՝ «Մոսկվա» կինոթատրոն, Երեւանի պետական կամերային թատրոն, Ստանիսլավսկու անվան ռուսական դրամատիկական թատրոն, Գ. Սունդուկյանի անվան ազգային ակադեմիական թատրոն, Հր. Ղափլանյանի անվան դրամատիկական թատրոն:
Երեւանի վարչական շրջաններից ծխառատ են համարվել Կենտրոն, Արաբկիր, Քանաքեռ-Զեյթուն վարչական շրջանները: Այս անվանակարգում իսկական մրցանակակիր չի եղել: Մարզական հաստատություններից ծխախոտից ազատ են ճանաչվել՝ «Աքվատեքը», «Օրանժը» եւ մի քանի այլ մարզական կենտրոններ: Կազմակերպիչները հանրային տրանսպորտը ծխախոտի ծխից ազատ միջավայր դարձնելու ջանքերի համար պատվոգիր շնորհեցին նաեւ «Երեւանտրանս» ՓԲԸ-ին, հատուկ մրցանակ շնորհվեց «ՎիվաՍել-ՄՏՍ»-ին, որը ոչ միայն ստեղծել է ծխախոտի ծխից զուրկ աշխատավայր, այլեւ աջակցել է «Հայաստանն առանց ծխախոտի» հասարակական դաշինքին՝ հակածխախոտային պայքարում:
«Այսօր մեր ազգաբնակչությունը, երեխաներն առնչվում են ծխախոտի ծխի հետ՝ ընտանիքներում, դպրոցներում, բակային միջավայրերում, այս միջոցառումը կարող է ինչ-որ կերպ օգնել հակածխախոտային պայքարում: Արգելումը ելք չէ, քանի որ կարող է առաջ բերել այլ հիվանդություններ»,- «Առավոտի» հետ զրույցում ասաց ՀՀ առողջապահության նախարարի տեղակալ Տիգրան Սահակյանը: ՀՀ առողջապահության նախարարության հակածխախոտային ծրագրի համակարգող Ալեքսանդր Բազարչյանն էլ մեզ հետ զրույցում տեղեկացրեց, որ Հայաստանը ծխող տղամարդկանց մեծ թվով աշխարհում առաջինների շարքում է. «16-ից բարձր դեռահասների եւ տղամարդկանց կեսից ավելին մեզ մոտ ծխող են»: Ինչ վերաբերում է ծխախոտ օգտագործող հայ կանանց եւ աղջիկներին, նա գտնում է, որ վերջին շրջանում ոչ թե նրանց կողմից աճ է նկատվում, այլ ծխախոտ օգտագործողներն են ավելի տեսանելի դարձել: Գիտականորեն ապացուցված է, որ ծխելը կախվածություն է առաջացնում: Իսկ ծխախոտից հրաժարվելու ամենակարեւոր պայմանը ռեալ ցանկությունն է: Եթե մարդը ցանկանում է թողնել ծխելը, կան նաեւ դեղամիջոցներ, որոնց օգնությանը նա կարող է դիմել: