Պեկինի իշխանությունները ծրագրում են մինչ 2015թ. ամբողջապես արգելել ծխելը հասարակական վայրերում: Ծխելը կարգելվի բոլոր հաստատություններում՝ ներառյալ բիզնես-կենտրոնները եւ մարզադաշտերը, ինչպես նաեւ տրանսպորտը: Հայտնի է, որ ավելի վաղ չինական կառավարությունն արդեն ընդունել էր որոշում, որը 2011թ. հունվարի 1-ից արգելում էր ծխել հասարակական վայրերում: Սակայն, ըստ Պեկինի տեղական իշխանությունների, այդ ժամկետն «անիրական» էր: 2008 թ. Օլիմպիական խաղերի նախօրեին քաղաքում արդեն ծխելու մասին արգելքը մտցվել էր, սակայն պեկինյան իշխանություններին չհաջողվեց այդ օրենքը ուժի մեջ պահել: Չինաստանում ապրում է աշխարհում ծխախոտ օգտագործողների մոտ 1/3-ը՝ գրեթե 350 մլն ծխող:
