Երկիշխանություն
![\"\"](\"https://www.aravot.am/2011/aravot_arm/January/21/p23.jpg\")
Երեկ Տիգրան Պետրոսյանի անվան շախմատի տանն ընթացող շախմատի Հայաստանի տղամարդկանց բարձրագույն խմբի 71-րդ առաջնության երրորդ տուրում խաղացված պարտիաներում միակ հաղթանակը տոնեց Զավեն Անդրիասյանը: Նրան անձնատուր եղավ Տիգրան Քոթանջյանը: Ռոբերտ Հովհաննիսյան-Տիգրան Լ. Պետրոսյան, Արման Փաշիկյան-Ավետիք Գրիգորյան, Հրանտ Մելքումյան-Արտաշես Մինասյան, Սամվել Տեր-Սահակյան-Արա Մինասյան, Աշոտ Անաստասյան-Դավիթ Գ. Գասպարյան հակամարտություններում կողմերը կիսեցին միավորը: Երեք տուրից հետո մրցաշարային աղյուսակը գլխավորում են կես միավոր կորցրած Հրանտ Մելքումյանն ու Արման Փաշիկյանը: Միակ մասնակիցը, որ միայն պարտություններ է կրել, Տիգրան Քոթանջյանն է:
Կրկին ոչ-ոքիներ
Վեյկ ան Զեեում շարունակվում է «Tata Stell Chess» շախմատային գերմրցաշարը: Մեկօրյա հանգստից հետո հինգերորդ տուրում «A» խմբում հանդես եկող Լեւոն Արոնյանը սեւերով միավորը բաժանեց ռուսաստանցի Վլադիմիր Կրամնիկի հետ եւ 3,0 միավորով Անիշ Գիրիի ու Մաքսիմ Վաշյե-Լագրավի հետ բաժանում է 3-րդ հորիզոնականը:
Կես միավոր վաստակեց նաեւ Գաբրիել Սարգսյանը: Նա նույնպես իր անվան դիմաց երեք միավոր է գրանցել եւ ընթանում է առաջատարների խմբում:
