ՀՀ ազգային բանակը հունվարի 28-ին դարձավ 19 տարեկան: Այդ առիթով ռազմահայրենասիրական միջոցառում էր կազմակերպվել Կոտայքի մարզի Հրազդանի N 7 միջնակարգ դպրոցում: «Զորություն բազկիդ, հա\’յ զինվոր» խորագիրը կրող միջոցառումն սկսվեց միասնական «Տերունական աղոթքով» եւ ՀՀ օրհներգով: Ապա աշակերտները ներկայացրեցին հայոց բանակի ստեղծման պատմությունը, արցախյան պատերազմի եւ քաջարի մարտիկների կյանքի հերոսական դրվագներ: Հնչեցին հայրենասիրական բանաստեղծություններ: Աշակերտների ուժերով բեմադրվեցին բանակի առօրյան ներկայացնող կտորներ, եղան պարային համարներ, ելույթներ: Միջոցառման ավարտին փակման խոսքով ներկաներին դիմեց դպրոցի տնօրեն Հասմիկ Ասատրյանը, որը խորհրդանշական օրվա կապակցությամբ շնորհավորելով ներկաներին, ասաց, որ պատմության ընթացքում հայրենիքի անվտանգության պահպանման հուսալի երաշխավորը եղել եւ մնում է հայոց զինուժը, հայ մարտիկը:
