«Առավոտի» «Գործարարից կյանք է խնդրում» (26.08.2011) հրապարակմամբ անդրադարձել էինք 21-ամյա Արտյոմ Առաքելյանի հաշմանդամության խնդրին: Նյութում նշված էր, որ Արտյոմը դեռ 13 տարեկան հասակում զրկվել է 2 ձեռքից եւ 2 անգամ կատարված պրոթեզավորումն անհաջող է ստացվել: Մի քանի անգամ երիտասարդը դիմել էր տարբեր հաստատություններ, որպեսզի կրկին պրոթեզավորվի, սակայն մերժվել էր: Արձագանքելով մեր թերթի հրապարակմանը, ԱԺ պատգամավոր Գագիկ Ծառուկյանն Արտյոմին օգնել է՝ ֆինանսավորելով պրոթեզները բերել Սանկտ Պետերբուրգից: Բացի նրանից, օգնելու ցանկություն են հայտնել «Արտմեդ» կենտրոնի բժիշկ-վիրաբույժ Էդուարդ Չոբանյանը եւ Գյումրիի քաղաքապետ Վարդան Ղուկասյանը:
Երիտասարդի պրոթեզները տեղադրվել են պրոթեզաօրթոպեդիկ կենտրոնում եւ շնորհիվ որակյալ պրոթեզների, Արտյոմն արդեն կարողանում է շարժել ձեռքերը եւ նոր ուսումնական տարվան լիարժեք պատրաստ է:
