Սյունիքի մարզի 10 համայնքում «Քաունթերփարթ ինթերնեշնլ» կազմակերպությունն առաջիկա 4 տարիներին կիրականացնի «Քաղաքացիական հասարակության եւ տեղական ինքնակառավարման աջակցություն» ծրագիրը: Գյուղերում ծրագիրը մեկնարկել է դեռեւս անցած հոկտեմբերին: Սա դրամաշնորհների ծրագիր է, համայնքներում ակտիվ բնակիչները նախագծեր են առաջարկում:
Գյուղերում հիմնականում ներկայացվել են վերանորոգման- շինարարական, քաղաքացիական հասարակության ակտիվացման, կրթական եւ այլ ծրագրեր: Գյուղերում պահանջվող գումարի 20 տոկոսը պետք է տա համայնքը, քաղաքներում՝ համայնքը պետք է տա 40 տոկոսը: Գյուղում դրամաշնորհի առավելագույն չափը՝ 1,7 միլիոն դրամ, քաղաքում՝ 3,5 միլիոն դրամ:
«Ծրագիրը գործում է Հայաստանի 43 համայնքներում, որից 10-ը՝ Սյունիքից: Քաղաքային համայնքներից ընդգրկվել են Կապանը, Սիսիանը եւ Մեղրին: Գյուղերից՝ Գորիսի տարածաշրջանից Խնձորեսկ, Հալիձոր, Շինուհայր, Քարահունջ, Կապանի տարածաշրջանից՝ Արծվանիկ, Սիսիանից՝ Սպանդարյան ու Աշոտավան համայնքները: Ընտրությունը կատարել է ԱՄՆ միջազգային զարգացման գործակալությունը` հանդիպելով համայնքի ղեկավարների հետ հաշվի են առնվել, թե ժողովրդավարական ինչ սկզբունքներով է ղեկավարվում համայնքը»,- ասում է ծրագրի մարզային համակարգող Լուսինե Շեգունցը:
Կապանում, օրինակ, առաջնային է համարվել բազմաբնակարան շենքերի մուտքերի վերանորոգումն ու դռների տեղադրումը, աղբահանության վիճակի բարելավումը, դպրոցների հարակից տարածքների, մայթերի բարեկարգումը, փողոցների ջրահեռացման խնդրի կարգավորումը, բացօթյա շուկաների համախմբման ու անհրաժեշտ տարածքի տրամադրման հարցը եւ այլն: «Քաունթերփարթ ինթերնեշնլ» կազմակերպության հետ Կապանի քաղաքապետը համագործակցության հուշագիր ստորագրել է հունիսին: Քաղաքապետ Արտուր Աթայանի խոսքով ՝մինչ օրս միջազգային կառույցների հետ սերտ համագործակցություն չի եղել, օրախնդիր շատ հարցեր լուծվել են տեղական բյուջեով եւ հանքարդյունաբերական ձեռնարկությունների աջակցությամբ:
Կարդացեք նաև
Ըստ քաղաքապետարանի ծրագրերի եւ արտաքին կապերի բաժի պետ Ա. Համբարձումյանի` համայնքի զարգացման 2009-2012թթ.-ի քառամյա ծրագրում նախատեսված մի շարք հիմնախնդիրների հնարավոր է եղել լուծում տալ, սակայն ֆինանսական սղության պատճառով այդպես էլ լուծում չի ստացել բազմաբնակարան շենքերի անհապաղ վերանորոգման կարիք ունեցող 114 տանիքների ու 35 վերելակների խնդիրն :
Մերի ՍՈՂՈՄՈՆՅԱՆ
