Ֆրանսիայի խորհրդարանի վերին պալատը՝ Սենատը մինչեւ հունվարի վերջը քվեարկելու է Հայոց ցեղասպանության ժխտման համար քրեական պատիժ սահմանող օրինագիծը, հաղորդում է BBC-ն։
Նույն աղբյուրի վկայությամբ, չնայած անցած տարվա դեկտեմբերի 22-ին Ֆրանսիայի Ազգային ժողովի կողմից օրինագծի ընդունմանը պաշտոնական Անկարայի կտրուկ հակազդեցությանը՝ ֆրանսիական կառավարության պաշտոնյաները տեղական լրատվամիջոցներին ասել են, որ քվեարկությունը վերին պալատում կայանալու է։
Անցած ամիս Ազգային ժողովի հավանությանը արժանացած օրինագծով նախատեսվում է մեկ տարվա ազատազրկում եւ 45 հազար եվրո տուգանք սահմանել Հայոց ցեղասպանությունը հրապարակավ ժխտողների նկատմամբ։
BBC-ն նշում է, որ Հոլոքոսթը ժխտողների նկատմամբ համանման պատիժ է սահմանված 1990 թվականից։
Կարդացեք նաև
Այնուհանդերձ, ֆրանսիական կառավարության որոշ անդամներ, այդ թվում՝ արտգործնախարար Ալեն Ժյուպեն, մտահոգություն են արտահայտել օրինագծի հնարավոր ընդունման առնչությամբ։
Ժյուպեն, մասնավորապես, նախագիծը որակել է «անօգուտ եւ անարդյունավետ» եւ դրա ընդունման դեպքում լուրջ հետեւանքներ է կանխատեսել ֆրանս – թուրքական հարաբերություններում։
Ըստ «Ազատություն» ռադիոկայանի
