Այսօր վանաձորցի ցուցարարները հարձակվել են Հելսինկյան քաղաքացիական ասամբլեայի Վանաձորի գրասենյակի վրա, ձվեր, քարեր շպրտել, ջարդել գրասենյակի ապակիները, ապա ներխուժել գրասենյակի տարածք եւ քաշքշելով աշխատակիցներին՝ անպարկեշտ արտահայտություններ թույլ տվել նրանց նկատմամբ: Արդյունքում աշխատակիցներից մեկի ոտքը վնասվել է:
Ոստիկանները հեռվից նայել են ցուցարարների գործողություններին:
Վանաձորցիները «Դավաճաններ, ամոթ է, թուրքեր» բացականչություններով կոչ են արել գրասենյակի ղեկավարությանը չցուցադրել «Խաղաղարար նախաձեռնությունների կովկասյան կենտրոնի » նախաձեռնած ադրբեջանական ֆիլմերը:
Կարդացեք նաև
Ցուցարարները չեն հանգստացել նույնիսկ այն ժամանակ, երբ գրասենյակի ղեկավար Արթուր Սաքունցը հայտարարել է, որ ֆիլմերի ցուցադրությունը Գեորգի Վանյանը հետաձգել է: Նրանք պահանջել են, որ ֆիլմերը ընդհանրապես չցուցադրվեն:
Հաշվի առնելով աշխատակիցների անվտանգությունը` գրասենյակի ղեկավարը հայտարարել է, որ գրասենյակում ֆիլմերը չեն ցուցադրվի:
«Ոստիկանության պահվածքը գնահատում եմ որպես անգործություն: Այստեղ առկա է կազմակերպված ճնշում գոնգոների , իշխանության կողմից ղեկավարվող կառույցների կողմից: Մեզ մոտ կարծիքի արտահայտման ազատության հնարավորությունը խախտված է, եւ այդ կարծիքի դեմ ոչ թե դնում ենք արգումենտներ, այլ ուժ ենք կիրառում: Այսպես իրավական պետություն չի կարող լինել»,-ասաց Արթուր Սաքունցը:
ՀՔԱ Վանաձորի գրասենյակը գրություն է ուղարկել Վանաձորի ոստիկանություն` կազմակերպության գործունեության եւ աշխատակիցների անվտանգությունը ապահովելու համար:
Անուշ ԲՈՒԼՂԱԴԱՐՅԱՆ
Վանաձոր
