Aravot.am-ը ՀՀԿ-ական պատգամավոր Արտակ Զաքարյանից հետաքրքրվեց՝ չորս կուսակցությունների մասնակցությամբ ձևավորված միջկուսակցական շտաբը, որն ըստ այդ կուսակցություններից որոշների՝ ձևավորվել է հենց ՀՀԿ-ին վերահսկելու համար, արդյունավետ կգործի՞: Պատգամավորը պատասխանեց. «Շտաբներով չէ, որ ընտրությունները պիտի վերահսկվեն: ՀՀԿ-ի դեմ որևէ բան լինել չի կարող, քանի որ ազատ, արդար և ժողովրդավարական ընտրությունների երաշխավորը հենց ՀՀԿ-ն է: Մենք ինքներս ունենք առաջարկներ և կոնկրետ գործողություններ այս առումով, արդեն իսկ ձևավորվել են մարմիններ և առաջիկայում հասարակությունը կհամոզվի, թե ընտրությունների վերահսկման որ մեխանիզմն է ավելի արդյունավետ»:
Մեր հարցին՝ միջկուսակցական շտաբ ձևավորած չորս կուսակցություններից ԲՀԿ-ից՝ որպես կոալիցիոն գործընկեր, ՀՀԿ-ն վիրավորված չէ°, պարոն Զաքարյանը պատասխանեց. «Քաղաքականության մեջ վիրավորված լինել- չլինելու խնդիրներ չպիտի դիտարկվեն: Խնդիրները պետք է դիտարկվեն քաղաքական տրամաբանության և անտրամաբանության շրջանակներում: Իսկ մնացած դեպքերում քաղաքական ուժն ինքն իր ճակատագրի և գործողությունների տերն է, իսկ գնահատողը և արդյունքներն ամփոփողը հասարակությունն է»:
Տաթև ՀԱՐՈՒԹՅՈՒՆՅԱՆ
